DILI, 25 Juñu 2026 (TATOLI)—Negosiante husi Merkadu Taibesi ho karreta Carry hitu mai Rezidénsia Farol, Kinta ne’e, hodi presta omenajen ba Saudozu Francisco Guterre ‘Lú Olo’, ne’ebé simu direta husi Saudozu nia oan mane Eldino Nobre no Felizito Samora Guterres.
Vizita ne’e simu husi protokolu, ne’ebé haruka negosiante sira tuur hodi hemu bee manas molok presta sira-nia omenajen ba maktoban Antigu Prezidente Repúblika, Francisco Guterres ‘Lú Olo’.
Tanba ema mai barak husi entidade oinoin, entaun negosiante sira tuur nafatin iha kadeira hodi hein protokolu bolu, maibé derepente de’it Saudozu Lú Olo nia oan mane na’in-2 ba komprimenta negosiante sira.
Notísia relevante : Ai-leba sira konsidera “Lú Olo” hanesan ai-hun ida-ne’ebé fó mahon ba ema hotu
Hafoin komprimenta, Saudozu nia oan mane sira akompaña negosiante sira hodi hakat tama ba rezidénsia hodi presta omenajen ba Saudozu nia kadaver.
Negosiante sira lori produtu lokál hodi oferese ba mate-uma.
Nogosiante Juvita da Costa Pereira, hateten, nia hamutuk ho negosiante barak mai presta omenajen ho sentimentu triste.
“Ami triste tebtebes tanba Prezidente Pai Lú ne’e laran di’ak ba ami povu sira ne’e, durante 24 anos nia iha ai-laran funu hamutuk ho nia maluk veteranu sira, nia fó fuan, fó laran mak ohin loron ita ukun-an, maibé ninia peregrinasaun iha mundu hotu ona ami povu triste tebes, entaun ami mai fó últimu omenajen ba nia,” Juvita da Costa hateten ba Ajénsia TATOLI iha Rezidénsia Farol.
Nia dehan, tuir loloos Saudozu nia peregrinasaun iha mundu seidauk hotu maibé tanba destinu entaun labele halo buat ida.
“Ohin ami koopera malu hodi mai vizita tiha Pai Lú tanba aban lori ona bá Metinaru,” nia tenik.
Tuir observsaun Jornalista Ajénsia TATOLI iha terrenu, nota katak tuku ema husi entidade oinoin kontinua presta omenajen ba Saudozu Lu Olo iha kalan ikus maktoban iha Rezidénsia Farol.
Jornalista : Natalino Costa
Editora : Julia Chatarina
