DILI, 25 Juñu 2026 (TATOLI) – Grupu ai-leba ne’ebé fa’an modo no ai-fuan fresku husi merkadu Taibessi ohin, pur voltade 10:30, mai iha rezidénsia maktoban antigu Prezidente Repúblika, Francisco Guterres “Lú Olo”, iha Faról, Dili hodi presta omenajen ikus no hato’o sentimentu laran triste ba família no povu timoroan tomak.
Vendedór sira ne’e faan ai-fuan hanesan sabraka, uva, hudi no seluk tan, forma iha estrada ibun ho matan ben no lori mós ho ai-funan no lilin hodi hein atu ba fó omenajen ikus ba atigu Prezidente Repúblika. Produtu sira ne’ebé sira leba entrega hotu ba família maktoban nu’udar “sinál domin” ba eis-Xefe Estadu.
Florinda dos Reis, ai-leba ida husi Turiskai, Munisípiu Manufahi, hateten katak inisiativa hatoo omenajen ba “Lú Olo” mai husi ideia ai-leba sira nian rasik, ne’ebé halibur malu hafoin rona notísia kona-ba eis-Xefe Estadu nia mate.
“Ami mai lori ai-fuan fresku no produtu agríkola sira nu’udar sinál agradesimentu no respeitu ba ami-nia nai-ulun ida ne’ebé durante nia moris hanoin ema ki’ik no ema ki’ak sira. Ami konsidera nia hanesan ai-hun ida-ne’ebé fó mahon no malirin ba ema hotu,” dehan Florinda.
Vendedora ai-leba ne’e haktuir, asaun ne’e mós hanesan forma karidade ida no expresaun simples husi komunidade ai-leba sira atu fó despedida ikus ba líder ida ne’ebé durante nia vida sempre fó atensaun ba povu ki’ik sira.
“Ami nia ai-hun ida tohar ona. Ami mai iha ne’e atu hato’o agradesimentu no fó matak-malirin ba nia. Maski nia isin la iha ona entre ita, maibé nia espíritu sei nafatin moris iha ami-nia laran. Ne’e hanesan asaun karidade ida, liman karuk fó, liman los la presiza hatene,” hateten Florinda.
Iha oportunidade hanesan, Manuel de Jesus, ai-leba ida ne’ebé durante tinan barak sai hanesan kliente abituál (langganan) ho “Lú Olo”, konta katak nia relasaun ho antigu Prezidente Repúblika ne’e iha tinan 2006 bainhira nia fa’an modo ho gerobak iha Dili.
Tuir Manuel, iha tempu ne’ebá, nia hetan oportunidade atu tama to’o iha rezidénsia eis-Xefe Estadu nian no hahú hamosu relasaun di’ak ida ho nia no nia família.
“Ha’u halo langganan ho Prezidente durante kuaze tinan rua. Bainhira ha’u lori modo ba nia uma, Prezidente rasik sai mai hola modo sira. Dalaruma ha’u mos haree nia halimar ho nia oan sira no nia família halo kafé mai ha’u hemu,” nia konta.
Manuel hateten katak “Lú Olo” la haree diferensa entre ema boot no ema ki’ik, no sempre simu di’ak ema sira ne’ebé mai hasoru nia.
“Prezidente hanoin duni ami ai-leba sira. Bainhira ha’u rona katak nia mate, ha’u laran triste loos. Dalaruma aban-bainrua difísil atu hetan ema ida hanesan nia no nia espoza. Maski ha’u dudu de’it gerobak ida foer los, maibé nia simu ha’u ho respeitu hanesan ema seluk,” dehan Manuel.
Nia akresenta katak notísia kona-ba “Lú Olo” nia mate halo ai-leba sira sente lakon líder ida ne’ebé besik ba povu no sempre fó atensaun ba sira nia moris loroloron.
Notísia relevante: Xanana Gusmão hato’o sentidu kondelénsia ba falesimentu Saudozu Francisco Guterres Lú Olo
Jornalista: Afonso do Rosário
Editora: Isaura Lemos de Deus
