Programa Humphrey Fellowship fó oportunidade ba timoroan prepara-an sai líder iha futuru
DILI, 05 Juñu 2026 (TATOLI) — Embaixada Estadu Unidus Amérika iha Timor-Leste, Dili, daudaun ne’e loke hela aplikasaun ba Programa Hubert H. Humphrey Fellowship 2027–2028 ba sidadaun timoroan ne’ebé iha esperiénsia profisionál no kompromisu maka’as ba serbisu ka atendimentu públiku nian.
Programa interkámbiu prestijiadu ida-ne’e, halo parte iha rede Fulbright, ne’ebé fornese ba joven profisionál sira iha karreira médiu ho oportunidade atu hala’o estudu pós-gradusuan (non gelar) dezenvolvimentu lideransa, no kolaborasaun profisionál ho parseiru sira iha Estadu Unidu durante tinan ida resin.
Iha pájina ofisiál Embaixada Estadu Unidu Amérika Timor-Leste nian ne’ebé fó sai, programa ne’e diriji ba profisionál sira ne’ebé hakarak hasa’e sira-nia kapasidade lideransa hodi kontribui ba dezenvolvimentu Timor-Leste liuhosi esperiénsia internasionál.
“Ita-boot sira hanesan profisionál nível médiu ida ne’ebé maka iha kompromisu ba serbisu públiku no hakarak lori mudansa ba Timor-Leste? Karik iha, ami enkoraja ita-boot atu aplika,” nota imprensa ne’ebé Tatoli asesa ohin.
Liuhusi programa ida-ne’e, kandidatu sira sei hala’o estudu no hetan pos-gradusaun iha universidade oioin iha Estadu Unidu Amérika, ne’ebé harii abilidade lideransa nian, habelar rede profisionál internasionál sira, no aprofunda komprensaun kulturál liuhosi interasaun direta ho sosiedade Amérika.
Programa ida-ne’e diferente ho programa akadémiku hanesan jerál, Humphrey Fellowship la fó grau akadémiku. Tanba ida-ne’e partisipante sira sei dezeña programa aprendizajen ida ne’ebé adapta ba sira-nia nesesidade kareira individuál, inklui hala’o estájiu profisionál semana neen iha instituisaun ida ne’ebé relevante ba sira nia kampu serbisu.
Aleinde ne’e, partisipante sira mós iha oportunidade atu hola parte iha atividade enrikesimentu oioin, konferénsia sira, vizita sira iha kampu, no fórum rede profisionál sira ho partisipante sira Humphrey Fellowship nian hosi nasaun oioin.
Programa ne’e nakloke ba kandidatu sira hosi setór públiku no privadu ne’ebé serbisu iha área komunikasaun no jornalizmu, lei no governasaun, polítika rekursu naturál, polítika públika no ekonómika, polítika no jestaun saúde públika, no polítika no jestaun teknolojia.
Hanesan programa interkámbiu profisionál ida ne’ebé prestijiadu liu ne’ebé finansia hosi Governu Estadu Unidu, Humphrey Fellowship kobre gastu partisipante hothotu, inklui billete viajen internasionál, gastu viajen relasionadu ho programa iha Estadu Unidu, propina, livru sira, subsídiu mensál ba moris, nomós apoiu finanseiru ba atividade dezenvolvimentu profisionál sira hanesan viajen konferénsia no vizita sira iha terrenu.
Atu bele hola parte iha selesaun, aplikante sira tenke sidadaun Timor-Leste, iha lisensiatura ne’ebé ekivalente ba programa tinan haat, pelumenus esperiénsia serbisu tinan lima hafoin kompleta ensinu lisensiatura antes Agostu 2026.
Aplikante sira mós tenke iha responsabilidade jestaun ka polítika iha sira-nia serbisu, iha abilidade lian Inglés ne’ebé di’ak tebes, no hatudu kompromisu atu fila mai Timor-Leste hafoin kompleta programa hodi aplika esperiénsia no koñesimentu ne’ebé hetan ona ba benefísiu dezenvolvimentu nasionál.
Hanesan parte ida husi prosesu selesaun, aplikante sira tenke hatama karta rekomendasaun tolu husi dosente no empregadór sira, nomós redasaun rua ne’ebé esplika planu dezenvolvimentu profisionál no kompromisu ba serbisu públiku.
Embaixada EUA mós konfirma katak sei fó prioridade ba kandidatu sira ne’ebé seidauk iha esperiénsia kle’an ka resente iha Estadu Unidu.
Entretantu, maioria aplikante lubuk ida maka deklara inelijível, inklui sira ne’ebé seidauk hetan grau lisensiatura, titulár dupla sidadania Estadu Unidu no Timor-Leste, indivíduu sira ne’ebé estuda ona ensinu pós-graduasaun iha Estadu Unidu durante tinan akadémiku ida ka liu iha tinan hitu ikus ne’e, no funsionáriu ajénsia Governu Estadu Unidu nian.
Aplikasaun sira hotu halo online liuhosi sistema aplikasaun ofisiál Humphrey Fellowship no sei taka iha loron 25 fulan-Jullu tinan 2026.
Programa Bolsa Estudu Hubert H. Humphrey nian iha dékada barak nia laran prodús ona líder sira, ema sira ne’ebé halo polítika, akadémiku sira, jornalista sira no profisionál sira hosi nasaun oioin ne’ebé maka hala’o ona papél ida hodi lori mudansa pozitivu iha sira-nia komunidade ida-idak.
Jornalista: Arminda Fonseca
Editór: Evaristo Soares Martins
