DILI, 06 Juñu 2026 (TATOLI) – Iha kapitál Timor-Leste komesa sente impaktu husi prosimidade Kopa Mundiál 2026. Iha dalan sira iha Dili, badeira husi nasaun oioin okupa iha ai-riin, motorizada, no iha vendedór sira-nia kaba’as, liuliu bandeira Portugál no Arjentina ne’ebé domina iha pontu venda no vizuál liu iha sidade.
Husi Komoro, pasa bá Bidau-Lecidere, vendedór ambulante espalla iha dalan prinsipál sira no área merkadu nian, oferese bandeira ho presu oioin entre sentavu 0,50 no dólar $5.
Iha zona Kolmera, movimentu ne’ebé maka’as durante loron. Entre tránzitu no anin manas meiu-dia nian, vendedór sira kontinua hatudu sira-nia produtu iha dalan atu ema sosa.
Pur volta tuku 11h00 atu hakat ba tuku 12, jornalista Tatoli konversa ho Martinho Pereira, tinan 22, ne’ebé fa’an bandeira Portugál no Arjentina iha ai-riin ida iha área ne’ebá.
“Ha’u fa’an [bandeira] Portugál mak barak liu tanba avó sira gosta CR7. Maibé, foinsa’e sira buka mak Argentina tanba Messi”, Martinho esplika.
Tuir vendedór, atividade fa’an bandeira komesa iha finál Maiu. “Ha’u hahú fa’an iha 29 Maiu. Ami sosa bandeira iha loja xineza nian mak fa’an fali. Lukru uitoan de’it. Bandeira ki’ik ami fa’an $0,50 ne’e ami manán $0,25, bandeira boot ami fa’an $5 ne’e ami manán $1”, nia haktuir.
Iha kalan, mezmu loja barak taka ona, bandeira kontinua fa’an iha dalan-ninin iha Dili. Motorizada no taksi sira sirkula ho bandeira iha kotuk, Portugál no Arjentina, ne’ebé anin huu hodi resforsa atmosfera kopa mundiál iha kapitál.
Vendedór barak ne’e kompostu mós husi estudante no traballadór kontratadu balun, ne’ebé fa’an produdu desportivu ne’e hanesan oportunidade hodi hetan rendimentu estra.
Maria Lourdes, labarik tinan 10 ne’ebé fa’an bandeira iha rotunda Komoro, esplika katak atividade ne’e ajuda no sustenta família. “Ha’u-nia inan fa’an modo, ha’u fa’an bandeira. Osan ne’e hodi bá sosa hahán no balun rai ba eskola hodi sosa kadernu no lapijeira”, nia dehan.
Iha komérsiu ba ropa desportivu, loja Taisala, rejista mós iha aumentu ema sosa kamizola selesaun nian hanesan Portugál, Brazíl no Arjentina.
Traballadór loja, Geovanio de Carvalho Amaral, afirma katak perfíl konsumidór muda iha trimestre daruak 2026. “Kliente sira barak liu sosa jersey Portugál, Brazíl no Arjentina tanba ekipa sira ne’e nia apoiante barak iha Timor-Leste”, nia salienta.
Nia hatutan, maski jersey sira ne’e fa’an ho presu asesivel, venda durante períodu preparasaun ba Kopa Mundiál la’o di’ak no kontribui ba aumentu rendimentu loja nian.
Tuir dadus preliminár husi loja, venda aumenta 65% kompara ho trimestre uluk, ho market share boot liu ba Argentina 38%, Brazíl 33%, no Portugál 29%.
Maski podér kompra limitadu, Taisala mantein estratéjia presu asessivel, ho presu kamizola ida $2. “Ami nia polítika mak inkluzaun. Labarik husi foho mós bele hatais jersey Kopa Mundial,” Geovanio dehan.
Nia akrexenta katak konsumidór la’ós sosa de’it produtu, maibé ne’e esperiénsia liga ba ambiente Kopa Mundiál. “Sira mai ho oin hamnasa, balun lori oan, balun mai ho kolega serbisu. Iha sira-nia ibun naran mak Ronaldo, Neymar, Messi. Sira sosa jersey la’ós halo buat oioin, maibé sira gosta duni sira-nia jogadór favóritu”.
Ho loromatan monu iha Dili, sidade mantein ho naroman husi movimentasaun iha dalan. Bandeira no kamizola kontinua hatudu iha loja no dalan sira, hein kliente foun ne’ebé sei mai.
Jornalista: Hortêncio Sanchez
Editora: Maria Auxiliadora
