DILI, 08 Juñu 2026 (TATOLI) – Bispu Osório Cítora Afonso, lider másimu Dioseze Katóliku Quelimane, mate iha nia rezidénsia Episkopál Quelimane Sentrál Mosambike iha sábadu (06/06) madrugada tanba hetan tiru ho arma.
Autoridade Igreja Katóliku iha paíz referidu konsidera kazu omisídiu ne’e hanesan “sirkunstánsia misterioza”.
Bispu Afonso, rasik Papa Leo XIV nomeia nu’udar Bispu Dioseze Quelimane iha Juñu 2025, maibé agora mate ho asaltu arma iha korridór rezidénsia episkopál. Relasiona mate ne’e, autoridade sira seidauk identifika autór, enkuantu motivu husi krime ne’e rasik seidauk klaru.
Prezidente Konferénsia Episkopal Mosambike, Arsebisu Inácio Saure, hato’o deklarasaun ofisiál, ba Aid to the Church in Need (ACN) katak Amu Bispu Afonso hetan tiru no mate iha kondisaun estrañu no seidauk iha klarifikasaun.
Tuir relatóriu inisiál husi autoridade Mosambikanu hato’o katak Bispu Afonso hetan tiro iha hirus-matan besik nia-fuan.
Enkuantu, tuir deklarasaun Arsebispu Saure nian ba ACN Portugál hato’o katak Igreja Katóliku iha Mosambike tama iha “Estadu Xoke”.
Nia husu ba parte igreja katóliku ninia “serenidade fiar no solidariedade fraterna” iha momentu difísil ida ne’e.
Fides News Agency fó-sai katak Servisu Nasional Investigasaun Kriminál Mosambike (SERNIC) loke ona investigasaun ba kazu ne’e.
Porta-vós, Servisu Nasional Investigasaun Kriminál Mosambike, Maximino Amílcar, hateten katak suspeitadu sira ne’e sa’e moru rezidénsia epikopál nian, dezativa tiha sistema seguransa elétriku nian mak foin tiru bispu ho kilat.
Depoizde rona notísia kona-ba Bispu Afonso nia-mate, Prezidente Mozambike, Daniel Chapo, hato’o kedas ninia mensajen lutu no konsternasaun. Prezidente ne’e, konidera lakon Bispu Afonso hanesan “irrezervavel” ba sosiedade Mosambike no komunidade kristaun.
Chapo subliña katak, Bispu Afonso mak ema ida ne’ebé iha nia moris tomak hatudu umilidade, dedikasaun pastorál, no kompromisu ba promove valór pás no rekonsiliasaun.
Tuir deklarasaun husi Santa Sé, hafoin rona Amu Bispu Afonso nia-mate, Papa Leo XIV hato’o kedas ninia lutu.
Papa hato’o katak nia simu notísia ne’e ho tristeza, no oferese ninia orasaun ba komunidade Katóliku iha Mosambike iha momentu “konfuzaun no laran susar” ne’e.
Papa Leo XIV husu atu Maromak fó konsolasaun ba Igreja no povu Mosambike, no atu proteje ema hotu husi violénsia.
Bispu Osório Cítora Afonso, tinan 54, nu’udar membru ida husi Konsolata Missionáriu, no servisu hanesan Bispu Dioseze Quelimane dezde nia nomeasaun iha 2025.
Maktoban ne’e mós serbisu nu’udar Administradór Apostóliku ba Arkidioseze Beira iha Abríl, hafoin Arsebisu Cláudio Dalla Zuanna rezigna-an tanba problema saúde.
Maktoban Bispu Afonso simu ordenasaun hanesan padre iha 2002. Nia estudu iha Roma no Jerusalém, Izraél antes ninia nomeasaun hanesan Bispu Ajuntu iha Maputo iha 2024.
Jornalista: Arminda Fonseca
Editór: Evaristo Soares Martins
