DILI, 09 Juñu 2026 (TATOLI)–Ministériu Edukasaun (ME) promove workshop nasionál ho tema “Inovasaun no Dijitalizasaun ba Servisu Edukasaun liuhosi Komunikasaun ne’ebé Efikáz no Efisiente”.
Inisiativa hala’o durante loron tolu, entre loron 09 to’o 11 Juñu, iha salaun Institutu Nasionál Formasaun Dosente no Profisionál Edukasaun, iha Balide, Dili, no halo abertura ofisiál husi Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos. Workshop ne’e nia objetivu atu hasa’e koñesimentu profesór no xefia kargu sira-ne’ebé utiliza teknolojia dijitál ba prosesu aprendizajen no jestaun administrativo iha eskola.
Eventu ne’e ne’e mós envolve espesialista edukasaun husi Bali, Indonézia, Mirca Umyaiti, hodi fahe nia esperiénsia kona-ba inovasaun iha metodolojia hanorin no utilizasaun plataforma dijitál iha prosesu aprendizajen.
“Dijitalizasaun sai hanesan pasu importante ida atu hasa’e efisiénsia servisu, asegura seguransa dokumentu no fasilita jestaun informasaun iha instituisaun edukativa sira,” Domingos Lopes Lemos hateten ba jornalista sira.
Tuir nia, sistema dijitál bele ajuda eskola sira guarda dokumentu ho seguru, hamenus utilizasaun papél no permite responde lalais ba pedidu informasaun no dadus husi ME no parseiru sira.
Nia akresenta katak ho dijitalizasaun bele fasilita preparasaun relatóriu, evita dokumentu importante lakon no apoia prosesu planeamentu no tomada desizaun ne’ebé bazeia ba dadus ne’ebé regorozu.
Governante ne’e dehan katak ME kontinua implementa programa dijitalizasaun iha eskola sira durante tinan 2026, inklui fornese komputadór no projetór ba sala aula sira atu apoia prosesu aprendizajen modernu.
“Eskola Tékniku Vokasionál no Ensinu Sekundáriu Jerál sei kontinua avansa ho dijitalizasaun. Instalasaun ekipamentu sira iha eskola balun la’o daudaun ona atu simplifika no mellora prosesu aprendizajen,” nia esplika.
Iha sorin seluk, Diretór Jerál Ensinu Sekundáriu, Deolindo da Cruz, informa katak ME prepara ona komputadór hamutuk 275 atu distribui ba eskola tékniku vokasionál sira iha territóriu tomak.
Tuir nia, ekipamentu sira-ne’e dadaun iha hela armazein lojístika ME no sei distribui ba eskola sira atu apoia implementasaun programa dijitalizasaun.
Iha fatin hanesan, Mirca Umyaiti hatutan katak sesaun formasaun sira sei foka ba inovasaun metodolojia hanorin, hasa’e kreatividade estudante sira no otimiza utilizasaun plataforma dijitál hanesan Google Forms no Google Workspace iha eskola tékniku vokasionál sira.
Jornalista: Osória Marques
Editór: Xisto Freitas da Piedade
