BOBONARU, 10 Juñu 2026 (TATOLI)-Progresu fíziku ba implementasaun projetu konstrusaun gapura (portaun entrada) no muru protesaun Jardín Eroi iha área Manu-Kaitete, suku Manapa, postu administrativu Kailaku, munisípiu Bobonaru, daudaun ne’e tama ona faze finalizasaun tanba atinje ona 95%.
“Hela finishing, ita garante meadu Jullu tenke remata. Agora, iha Gapura nia mak falta de’it monta odomatan, sira seluk ne’e hotu ona”, enjeñeiru emreza AM Lihchoe Lda., Nelson Emanuel Ena, informa via telefone, ohin.
Kona-ba gabiaun metru hira ne’ebé atu instala iha parte rai-halai nian, enjineiru ne’e fundamenta katak Ministeriu Asuntu Kombatente Libertasaun Nasionál mak sei determina.
“Uluk sira ho ADN orienta ami monta ona rede, agora halo tan bronjong metru hira ne’e desizaun husi sira”, nia dehan.
Iha sorin seluk, abitante Zeferino de Jesus Afonso rekomenda ba Governu atu kontinua projetu konstrusaun semitériu, nune’e bele haloot ona eroi sira nia restu mortál ne’ebé daudaun ne’e konserva iha hela osuáriu.
“Ita-nia eroi sira-nia ruin ne’e kee tinan barak ona, agora balun tau iha Bobonaru ne’e fatin ladún di’ak. Uluk hariis-fatin ne’e mak hadi’a tiha tau eroi sira-nia ruin iha laran. Agora bandeira sira nakles hotu ona, kaixaun mós balun dodook ona. Ita sente ladún justu tanba sira-nia luta mak ohin ita goja ukun-an, ne’ebé presiza halo lalais para tau sira iha fatin dignu”, katak.
Obra konstrusaun gapura no muru ne’e gasta orsamentu hamutuk $408.325,67 ho durasaun kontratu fulan 12. Governu liuhusi Ministériu ba Asuntu Kombatente Libertasaun Nasionál konstrui Jardín Eroi ne’e ho objetivu mak atu haloot restu mortál eroi libertasaun nasionál sira ho dignu, tanba daudaun ne’e sei konserva hela iha osuáriu Maliana no fatin seluk tan.
Notísia relevante: Veteranu Bobonaro husu Governu labele demora haloot restu mortál sira iha osoáriu
Jornalista: Sergio da Cruz
Editora: Maria Auxiliadora
