BOBONARO, 29 agostu 2023 (TATOLI)—Vise Prezidente Konsellu Veteranu Munisipál Bobonaro, Luçio Dinis Marqués ‘Onsar’, husu Governu atu labele demora tempu hodi haloot restu mortál sira-ne’ebé rekolla iha tinan 2018 to’o 2020 ne’e,tánba ágora preserva iha osariu ne’e fatin dignu.
Notísia Relevante: Governu-Veteranu Bobonaro deside harii jardín eroi iha Manapa
“Tuir ha’u nia hanoin, kuandu demora liu restu mortál tau iha mahon, balun di’ak no balun mahon ladi’ak, ne’e estraga estáblidade. Tanbasá? Tanba rai kle’ur demáis, agora tinan haat liu ona, tuir lolos ita hasai mai ne’e pelumenús demora fulan ida deit, ita lori ba haloot liu iha Fatin dignu,” Luçio Dinis Marqués ‘Onsar’ hateten ba Agência Tatoli liuhosi ninia reflesaun ba komemorasaun loron konsulta populár ba dala-24 (30 agostu 1999-30 agostu 2023) iha nia kna’ar fatin, tersa ne’e
Konsellu Veteranus Munisípiu Bobonaro hahú hosi tinan 2018 to’o 2020 rekolla ona restu mortál tinan 1975 to’o 1999 hamutuk 800-resin iha aldeia, suku no postu administrativu sira, ne’ebé agora hatuur hela iha Osoáriu Odomau Maliana kuaze 500 no iha Bobonaro villa 300-resin.
Maibé Veteranus ‘Onsar’ komfirma restu mortál hirak ne’e to’o ágora seidauk haloot, tanba Governu seidauk konstrui jardín eroi da patria foun
“Agora lae, mate-ruin sira hosik kle’ur iha ne’ebá to’o rai rahun kaer, dala ruma Sunu Lilin han hotu Bandeira ho kaisaun, ida-ne’e ita tau todan hotu ba Governu sira mak hadau malu Ukun ne’e mak hatene. Sira haruka ami halo, maibé agora hansan tía ne’e atu halo nusa,” nia dehan.
Notísia Relevante: MAKLN sei haloot restu mortál 3.740-resin iha 2023
Iha VIII Governu Konstitusional nia mandate, Governu konsege orienta ona empeza Mira-Mar Unipesoál, Lda, ateru ona rai atu prepara ba futuru konstrusaun Jadin Erois Foun Munisípiu Bobonaro iha rai ektare 80 ne’ebé lokáliza iha área Manu Kaitete, ne’ebé baliza entre postu administrativu Maliana no Cailaco.
Maibé, Veteranu ne’e haktuir momentu ne’ebá empreza refere halo servisu laiha Liña koordensaun ho Konsellu Veteranu Munisipál Bobonaro ne’ebé hanehan na’in ba rai.
“Agora sira komvida ami ba haree fatin ne’e ladún profisionál. Fatin ne’e kompania bele gasta osan tuir sira nia pedidu rihun $200, maibé fatin ne’e ami haré naruk liu. Se sira koordena ho ami bele hatudu fatin ne’ebé kapaas sira hasai de’it ai labele kee ona rai. Agora sira lee rai kuaze metru 10, bainhira mak halo jardín erois, bainhira mak halo lutu, bainhira mak kee-kanu haleu, ida-ne’e susar la halimar,” nia hateten.
Maske, nia dehan, kestaun ne’e hato’o ona ba Sekretáriu Estádu Asuntu Kombatente Libertasaun Nasionál hafoin partisipa Serimonia Komemorasaun loron Falintíl 20 agustu iha aldeia Odelgomo, suku Ai-Asa, postu administrativu Bobonaro.
Notísia Relevante: PN aprova rezolusaun kona-ba devolusaun restu mortál
Nornalista : Sergio da Cruz
Editór : Cancio Ximenes
