Governu-Veteranu Bobonaro deside harii jardín eroi iha Manapa

BOBONARO, 25 abríl 2022 (TATOLI) – Governu liuhosi Sekretáriu Estadu ba Asuntu Kombatente Libertasaun Nasionál (SEAKLN), Júlio da Conceição ‘Loro-Mesak’, tersa ne’e enkontru ho Konselu Veteranu Munisípiu (KVM) Bobonaro, konkorda harii jardín eroi iha área Manu-Kaitete, suku Manapa, postu administrativu Cailaco nune’e haloot restu mortál sira iha fatin dignu.

Diskusaun ne’e partisipa hosi veteranu sira iha munisípiu Bobonaro, liuliu sira-ne’ebé konsentra iha kapitál Maliana, nune’e ‘Loro-Mesak’ fó oportunidade hodi rona opinaun hosi veteranu sira atubele buka fatin própriu atu haloot restu mortál hosi tinan 1975 to’o 1999 ne’ebé daudaun ne’e konserva hela osoáriu Maliana no suku Malilait, postu administrativu Bobonaro.

Nune’e iha diskusaun ne’ebé la’o kuaze oras rua ne’e, veteranu sira hamutuk ho konsellu veteranu munisipál sira iha konkordánsia ho governu deside haloot restu mortál sira-ne’e iha área Manu-Kaitete, suku Manapa, postu administrativu Cailaco ho totál rai ektare 82 ne’ebé iha tinan hirak liubá komunidade oferese gratuita ba governu atu konstrui Jardim dos Herois.

Rai ne’e komunidade oferese direitamente ba governu no asina ona akta entrega hosi Administradór Postu Administrativu Maliana, Cailaco, Prezidente Autóridade Munisípiu Bobonaro sesante, Jeferino Soares, Ministru Asuntu Kombatentes Libertasaun Nasional (MKALN) Júlio da Costa ‘Meta-Malik’ iha tinan 2021 liubá.

“Ita hotu konkorada katak 2023 sei haloot restu mortál iha jardín ne’ebé rai komunidade sira oferese, ida-ne’e orsida ha’u fila sei ko’alia ho ministru hodi informa atubele diskute iha Konsellu Ministru nune’e tinan oin ita bele tau orsamentu atu hahú konstrusaun,” Júlio da Conceiçao ‘Loro-Mesak’ promete iha ámbitu diskusaun ne’ebé realiza iha edifísiu provzóriu konsellu veteranu munisípiu Bobonaro.

Ezekutivu husu ba konsellu veteranu munisipál no responsável postu administrativu sira atu koordena ho família hodi rekolla restu mortál ne’ebé seidauk hetan no balun haloot iha semitériu públiku sira atu nune’e bele haloot iha fatin ida de’it.

“Ha’u-nia hanoin mak ne’e, sira-ne’ebé mate rejistu de’it ona ba, sé hatene ruin iha, prontu ita bele foti, maibé lahatene di’akliu lalika tanba labele halo hanesan iha fatin balu hatene dehan ema ne’e mate iha-ne’e, depois ba buka la hetan ruin, lori fali fatuk ida tau ba kaixaun jadi ona, ida ne’e labele halo,” Governante ne’e sujere.

Vise Prezidente Konselu Veteranu Munisípiu Bobonaro, Lúcio Dinis Marques ‘Onsar’, hateten razaun governu konstrui Jardim dos Herois, tanba Osoáriu sira-ne’ebé konstrui fatin la dignu ona no la sufisiente ona atu akumula restu mortál hotu iha munisípiu Bobonaro.

“Ami durante ne’e esforsu maibé laiha orsamentu, entaun fatin ne’ebá kaixaun lahuk hotu ona, bandeira mós laho haan hotu ona, entaun governu presiza aselera duni jardín ne’e,” nia rekomenda.

Veteranu Apolinário Barros konkorda hakarak governu konstrui Jardim dos Herois iha Manu-Kaiitete tanba rai ne’ebé komunidade oferese asina ona akta iha tinan kotuk no serimónia kulturál mós halo hotu ona hein governu halo konstrusaun.

“Ha’u hanoin katak laiha tán dalan seluk atu muda ba eskerda ka direita, desizaun atu haloot restu mortál ne’e tenke iha fatin foun, tanba aban bainrua bele loke tán buat barak ne’ebé presiza,” nia akresenta.

Responsável Konselu Libertasaun Veteranu Postu Administrativu Maliana, Augosto Caetano, hateten governu presiza muda duni fatin ne’e nune’e bele akumula restu mortál iha munisípiu Bobonaro tomak.

Entretantu munisípiu Bobonaro iha osoáriu iha fatin rua ho totál restus mortál 770, ida iha suku Odomau, postu administrativu Maliana akumula restu mortál hosi tinan 1975 to’o 1998 totál 578 no osoariu iha suku Malilait, postu administrativu Bobonaro akumula restu mortál 192.

Jornalista   : Sérgio da Cruz

Editór         : Evaristo Soares Martins