DILI, 10 Juñu 2026 (TATOLI)—Primeiru-Ministru, Kay Rala Xanana Gusmão konsidera Vietname nu’udár parseiru importante ida ba dezenvolvimentu Timor-Leste no reafirma atu kontinua hametin kooperasaun bilaterál iha área estratéjika oioin.
“Ami sente onradu mai iha Vietname nu’udár nasaun belun di’ak ida, Timor-Leste valoriza tebes Vietname nu’udár belun ida ne’ebé kleur ona. Ita-nia nasaun rua fahe esperiénsia istórika importante, luta ba dignidade nasionál, rekonstrusaun no kompromisu atu harii instituisaun forte hodi hadi’a povu nia moris,” Deklarasaun ne’e PM Xanana hato’o durante enkontru bilaterál ho Primeiru-Ministru Vietname, Le Minh Hung, iha Hanoi Vietname, ne’ebé Agência Tatoli asesu liuhusi nota, tersa (09/06) ne’e.
Xefe Governu mós subliña katak investimentu Vietname nian fó ona kontribuisaun signifikativu ba Timor-Leste, partikularmente iha setór telekomunikasaun liuhusi Telemor, ne’ebé ajuda habelar konetividade móvel iha nasaun laran tomak.
“Tanba ne’e, Timor-Leste hakarak kontinua atrai investimentu no kooperasaun husi Vietname iha área estratéjika sira hanesan agrikultura, peska, turizmu, infraestrutura no dezenvolvimentu rekursu umanu ne’ebé konsideradu importante bá dezenvolvimentu ekonómiku nasaun nian,” nia dehan.
Seguransa aihan sai prioridade nasionál
Timor-Leste mós manifesta interese atu esplora renovasaun akordu komérsiu foos nian ne’ebé kaduka dezde tinan 2017, nune’e tuir nia katak seguransa ai-han kontinua sai prioridade nasionál ida no Vietname iha esperiénsia importante nu’udár esportadór foos iha rejiaun hotu.
“Timor-Leste mós simu ho laran-haksolok proposta Vietname nian atu estabelese Komisaun Konjunta ba Kooperasaun Bilateral, ne’ebé sei sai mekanizmu importante hodi hametin relasaun no amizade entre nasaun rua,” nia hateten.
PM Xanana aproveita hato’o agradesimentu ba Vietname ne’ebé fó apoiu bá adezaun Timor-Leste nian ba ASEAN, ne’ebé konsideradu nu’udár pasu istóriku ida ba integrasaun rejionál Timor-Leste nian.
“Ami hakarak aprende husi Vietname nia esperiénsia, partikularmente iha integrasaun ekonómika, dezenvolvimentu institusionál, diplomasia rejionál no koordenasaun ASEAN nian. Ami mós fó sai ona ami-nia intensaun atu prezide ASEAN iha 2029 no hein atu simu Vietname nia apoiu no orientasaun,” nia hateten.
Nia mós aborda situasaun globál atuál no enfatiza importánsia respeitu ba lei internasionál, diálogu no kooperasaun hodi prevene konflitu sira.
“Vietname hatudu ona, katak diplomasia bele kontribui ba estabilidade no dame, la’ós de’it iha Sudeste Aziátiku maibé iha komunidade internasionál tomak,” nia observa.
Enkuantu hafoin enkontru bilaterál, Timor-Leste ho Vietname asina mós akordu haat atu hametin kooperasaun entre nasaun rua.
Akordu bilaterál ho Vietname
Akordu rua relasiona ho edukasaun no ensinu superiór, ho objetivu atu promove parseria entre instituisaun akadémika no peskiza, interkámbiu estudante no dosente sira, dezenvolvimentu programa formasaun no peskiza, no promosaun oportunidade bolsa estudu.
Akordu seluk mak izensaun vistu ba portadór pasaporte komún no ikus liu mak kooperasaun entre Agência Noticiosa Timor-Leste-TATOLI, I.P. no Viet Nam News Agency (VNA).
EKIPA TATOLI
