KOVALIMA, 11 Juñu 2026 (TATOLI) – Sekretariu Estadu Formasaun Profisionál Empregu (SEFOPE), Munisípiu Kovalima kontinua fó kursu dalén inglés ba faze dahaat ba kandidatu traballadór Austrália na’in-27, iha sentru formasaun Lakonak ne’ebé lokaliza iha Suku Debos, postu Administrativu Suai, Kovalima.
“Ita kontinua fasilita formasaun dalén inglés ba kandidatu traballadór sira, ne’ebé tama ona ba faze dahaat ne’e kandidatu traballadór na’in-27 mak tuir hela formasaun besik finaliza ona tanba komesa iha fulan-Marsu”, Diretór SEFOPE Munisípiu Kovalima, Stefanos Segundo Manek, informa ba TATOLI iha SEFOPE Kovalima, Tabakolot.
Polítika SEFOPE kontinua fasilita formasaun dalen inglés ba kandidatu traballadór ne’ebé mak nia naran rejista iha Sistema iha SEFOPE atu bá servisu iha Austrália tuir prosesu Pacific Australian Laborál Mobility (PALM).
“Formasaun dalén inglés faze bahaat ne’e hanesan ikus ona, nune’e atu kontinua formasaun ami sei hein orientasaun husi Sekretáriu Estadu atu fó oportunidade ba sidadaun sira ne’ebé nia naran la rejista iha sistema mós depende desizaun husi Sekretáriu Estadu SEFOPE”, nia afirma.
Fó hanoin fali katak iha 2024, SEFOPE fó teste dalén inglés ba kandidatu traballadór Austrália husi munisípiu Kovalima hamutuk 3,184, tuir prosesu Pacific Australian Laborál Mobility (PALM) ne’ebé atu ba servisu iha Austrália.
Tuir dadus husi SEFOPE Kovalima rejista hahú 2012-2024, Kovalima-oan ne’ebé sai ona traballadór iha nasaun estranjeiru hamutuk 1,255 husi dadus ne’e Kovalima-oan sai ona traballadór iha Austrália hamutuk 854,sira ne’ebé fila ona mai Timor-Leste hamutuk 539 no sira ne’ebé mak ativu servisu iha Austrália 315.
Jornalista: Celestina Teles
Editor: Florencio Miranda Ximenes
