DILI, 11 Juñu 2026 (TATOLI)–Tribunál Judisiál Primeira Instánsia Dili (TJPID), Kinta ne’e, liuhusi Juíz Ivan Patrocino Suritai, halo interrogatóriu judisiál dahuluk ba krime hadau sasán iha dalan, envolve husi arguidu na’in-rua JACDR no MZX, ne’ebé rezultadu Nadine Ribeiro do Carmo mate iha lokál akontesimentul, enkuantu Euodia Agile do Carmo hetan kanek grave.
Kazu ne’e akontese iha área Praia dos Coqueiros, iha Loja 24 ida nia oin, iha Domingu (07/06) foin lalais ne’e.
Durante prosesu interrogatóriu dahuluk ne’e, Juíz Prosesu halo identifikasaun ba arguidu na’in-rua. Enkuantu, Ministériu Públiku ne’ebé reprezenta husi Prokuradór Adérito Tilman promove arguidu sira ho krime tolu hanesan krime roubo, omesídiu niglijente no ofensas integralidade fízika, ne’ebé rezulta Nandine lakon vida.
Notísia relevante : Forénsiku HNGV finaliza ona autopsia ba matebian Nadine no entrega hikas ba familia
Nune’e, iha alegsaun ba kazu ne’e, Ministériu Públiku (MP) solisita ba Tribunál aplika medida koasaun Prizaun Preventiva ba arguidu JACDR no MZX.
Iha parte seluk, Defeza ne’ebé reprezenta husi Defensór Públiku, Fernando Carvalho ne’ebé fó asisténsia legál ba arguidu na’in-rua, husu ba Tribunál atu aplika medida koasaun Apresentasaun Períodika.
Hafoin Tribunál rona tiha parte hotu, Tribunál adia prosesu ne’e ba tuku 14:00 lorokraik hodi hasai despaixu ba kazu ne’e.
Jornalista : Natalino Costa
Editora : Julia Chatarina
