MALIANA 12 Juñu 2026 (TATOLI) – Diresaun Nasionál Transporte Terrestre (DNTT) delegasaun territoriál Bobonaru no Polísia Nasionál Timor-Leste (PNTL), liuhusi Seksaun Tránzitu no Seguransa Rodoviária husu komunidade atu aumenta konxiénsia no disiplina iha utilizasaun estrada públika hodi redús númeru asidente tráfegu ne’ebé kontinua sa’e iha Maliana no postu administrativu sira seluk.
Diretór DNTT Bobonaru, Tomás Maia, hateten katak maioria asidente ne’ebé rejista durante ne’e envolve ema adultu no akontese tanba falta atensaun, disiplina no responsabilidade durante kondusaun.
Notísia relevante:PNTL aprezenta evidénsia no testemuña ba MP kona-ba asidente iha Maravilla
Nia apela ba inan-aman sira atu konsidera idade no maturidade oan sira antes fó oportunidade ba sira atu kondús motorizada ka karreta. “Importante atu proteje ita-nia oan sira tanba sira mak jerasaun futuru rai ida-ne’e. Inan-aman tenke haree didi’ak idade no mentalidade oan sira molok fó veíkulu ba sira”, nia hateten.
Tomás Maia esplika katak DNTT instala ona sinalizasaun vertikál no orizontvl iha estrada públika atu ajuda utilizadór sira komprende no kumpre regra tránzitu. Nia akrexenta katak instituisaun kontinua halo inspesaun ba kondisaun veíkulu sira, inklui travaun, lampu, roda no ekipamentu seguransa seluk
“Objetivu husi inspesaun ne’e atu garante seguransa ba ema ne’ebé uza veíkulu no mós ba utilizadór estrada sira seluk”, nia dehan.
Iha parte seluk, Komandante Seksaun Tránzitu no Seguransa Rodoviária Bobonaru, Inspetór Asistente João Belo, hateten katak melloramentu estrada urbana iha Maliana fasilita mobilidade, maibé mós lori konsekuénsia husi aumentu velosidade ne’ebé kontribui ba asidente.
Nia apela ba motorista no motosiklista sira atu respeita sinalizasaun estrada, uza kapasete, sintu seguransa no ekipamentu protesaun sira seluk durante viajen.
“Uza via públika ida-ne’e ho disiplina, tenke iha konxiénsia, haree no atensaun ba sinalizasaun vertikál no horijontál. Se ita halo tuir loloss sinál sira ne’e asidente sei tun no asidente fatál sei la akontese”, nia fó hanoin.
Dadus PNTL Bobonaru hatudu katak husi Janeiru to’o 11 Juñu 2026 rejista ona asidente tráfegu 40-resin iha Bobonaru. Husi númeru referidu, ema na’in-tolu lakon vida iha insidente diferente ne’ebé akontese durante Marsu, Abríl no Maiu.
“Estrada Maliana uluk aat ne’e asidente menus, mais agora estrada kaber asidente hahú Janeiru to’o Maiu ne’e sa’e”, dehan.
Área sira ne’ebé rejista asidente barak liu mak estrada urbana Maliana, estrada internasionál husi Batugadé bá Loes, husi Nunura baáMaliana Vila no trosu husi merkadu Maliana bá Mau-Mali Ritabou.
Atu responde ba situasaun ne’e, DNTT no PNTL kontinua halo programa sensibilizasaun iha suku, eskola no meiu komunikasaun sira atu hasa’e koñesimentu komunidade kona-ba seguransa rodoviária no importánsia respeita regra tránzitu.
Notísia relevante: PNTL Bobonaru rejista asidente tráfegu 42 inklui na’in-tolu lakon vida
Jornalista: Sergio da Cruz
Editora: Maria Auxiliadora
