BOBONARU, 11 Juñu 2026 (TATOLI)- Asidente dupla ne’ebé rezulta Xefe Suku Guda, Cirilo Moniz, lakon vida iha estrada públika, iha área Maravilla, postu a,dministrativu Maliana iha loron 31 Maiu ne’e, Polísia Nasionál Timor-Leste (PNTL) liuhusi Seksaun Tránzitu no Seguransa Rodoviária, Komandu Munisípiu Polísia Bobonaru, aprezenta ona evidénsia no testemuña ida ba Ministériu Públiku (MP) hodi prosesu tuir lei ne’ebé vigora.
Komandante Seksaun Tránzitu no Seguransa Rodoviária, Komandu Munisípiu Polísia Bobonaru, Inspetór Asistente João Belo, dehan testemuña ne’e aprezenta husi família hafoin akontesimentu loron hitu.
“Ligadu ho matebian xefe suku Guda, ita rekolla hotu evidénsia dentru de oras 72, ita enkamiña ona evidénsia motorizada rua, inklui faktus balun ba Ministériu Públiku. Liu tiha loron hitu fámilia maktoban mai aprezenta fali iha kuartél komandi lori ho mós joven ida prontu atu sai testemuña ho ida-ne’e ita kontaktu ho Ministériu Públiku, ita aprezenta ona testemuña ne’e ba Ministériu Públiku”, João Belo hateten iha Rádio Komunidade Maliana, kinta ne’e.
Notísia relevante: Laiha testemuña no CCTV difikulta PNTL investiga asidente Maravilla
Nia dehan mosu komentáriu oioin iha mídia sosiál hodi kontra deklarasaun Segundu Komandante, Superintendente Carlos Moniz Maia, foin lala’is ne’e, no parte família matebian husu ona deskulpa ba Komandu Munisípiu no sira rekoñese katak protestu ne’e lansa ho emosionál tanba lakon sira-nia ema.
“Kazu ne’e balun rona de’it informasaun, akompaña de’it mídia hodi halo komentáriu oioin, maibé ita-nia seksaun tránzitu rasik tun bá terrenu, haree no atende ho di’ak. Ita lori vít-ma na’in rua, autór Revo Fit ba ospitál referénsia atende no transfere bá Ospitál Nasionál Guido Valadares Dili, agora halo tratamentu”, nia dehan.
Kona-ba polémika kona-ba informasaun katak matebian xefe suku Guda iha influensoa ho alkohol, Inspetór Asistente ne’e esklarese katak deklarasaun bazeia ba atendimentu no identifikasaun iha terrenu. “Ita-nia maktoban ne’e reafirma husi nia oan no família katak dezde nia sei joven to’o lakon vida, nunka konsumu alkohol, maibé ita-nia atendimentu iha terrenu nota ita sente duni katak iha iis tua. To’o bá ospitál atendimentu iha médiku sira mós tua iis, tanba ne’e mak ita fó sai dehan ita deskonfia”, nia realsa.
Sidadaun ne’ebé kondús motór Revo Fit kontinua hetan asisténsia medíka iha Ospitál Nasionál Guido Valadares no matebian Cirilo Moniz fámilia halot ona iha nia knua Guda-Taz.
Notísia relevante: PNTL Bobonaru rejista asidente tráfegu 42 inklui na’in-tolu lakon vida
Jornalista: Sergio da Cruz
Editora: Maria Auxiliadora
