DILI, 12 Juñu 2026 (TATOLI)—Governu liuhusi Ministériu Obra Públika (MOP) kontinua selebra kontratu ho kompañia manán-na’in sira atu reabilita estrada rurál pakote 12 iha Munisípiu Ermera no Manatutu.
Ministru Obras Públika, Samuel Marçal, hateten nia parte seidauk bele fó parabens uluk ba emprezáriu sira tanba seidauk implementa servisu iha terrenu hodi hatudu rezultadu ne’ebé di’ak.
“Prinsipalmente ho projetu sira-ne’e la’ós atu halo ita sai riku maibé ida-ne’e intensaun husi Governu atu halo investimentu ba iha setór privadu sira,” Ministru ne’e informa ba jornalista sira iha edifísiu MOP Kaikoli, kinta (11/06) ne’e.
Tanba, nia dehan, iha situasaun COVID-19 nian fó impaktu ba setór privadu sira kuaze monu (bankrut), nune’e iha Governu konsitusionál da-sia (IX) iha polítika halo projetu barak ho objetivu halo investimentu ba setór privadu, kria empregu ba joven sira no garante asesibilidade ba povu.
“Bainhira imi iha oportunidade kaer projetu ida tenke kaer ho responsável. Lalika hanoin atu muda moris di’ak lalais, maibé rai osan uitoan hodi halo investimentu ba imi-nia empreza rasik,” nia esplika.
Diretór Jerál Ministériu Obra Públika, João Amaral, informa prosesu aprovizionamentu ne’e hahú iha fulan-Dezembru 2025, pakote Ermera nian ho totál orsamentu millaun $3-resin no pakote iha munisípiu Manatutu nian ho orsamentu hamutuk millaun $2-resin.
“Parabéns ba emprezáriu na’in-12, maibé servisu tenke tuir termu kontratu ne’ebé mak di’ak no tenke garante nia kualidade,” nia dehan.
Nia konsidera, tanba bainhira infraestrutura kualidade sei fó benefísiu ba munisípiu rua ne’e no nia mós husu ba sira stu labele faan tutan projetu ne’e ba empreza seluk.
Jornalista : Alexandra da Costa
Editór : Cancio Ximenes
