AINARU, 10 Juñu (TATOLI)-Gabinete Asuntu Sosiál Prezidénsia Repúblika, kuarta ne’e, fó apoiu umanitária hanesan sasán nesesidades bázika no osan privadu husi Xefe Estadu ba família kbi’it la’ek Sabina Bianco Xavier ne’ebé sofre defisiénsia fizika iha suku Mau-Nunu, postu administrativu Ainaru, munisípiu Ainaru.
Asesór Sosiedade Sivíl no Asuntu Sosiál, Quintiliano Moniz Carvalho ho ekipa mak oferese apoiu ne’e no promete sei buka solusaun ba Joanina de Araújo nu’udar alin husi invalidéz Sabina Bianco Xavier, atu kontinua ninia estudu tanba durante ne’e la eskola hodi kuidadu ninia bin.
Notisia Relevante :PR apoiu nesesidade báziku ba familia vulneravél iha munisípiu tolu
João Xavier nu’udar aman husi família kbi’it la’ek ne’e informa iha oan hamutuk na’in hitu maibé na’in rua mate ona no falta na’in lima, husi na’in lima ne’e, na’in rua forma ona uma ka’in, na’in tolu, ida maka sofre problema defisiénsia fizika.
Tuir João, ninia oan daudaun ne’e kompleta ona tinan 30, bainhira moris ho kondisaun normal, maibé, liutiha tinan ida, hetan moras beibeik to’o kanek iha kakorok hodi rezulta defisiente fíziku.
“Ami husu ba Prezidente Repúblika atu bele fó tratamentu ba Sabina Bianco Xavier, inklui apoiu ba nia-alin na’in rua ne’ebé labele kontinua eskola tanba tenke kuida nia. Se bele, na’in ida hetan netik servisu ruma, hanesan dasa rai, hodi bele sustenta mós família uma laran,”nia informa ho triste ba jornalista sira iha Ainaru.
Nia dehan, antes ne’e, Cruz Vermelha de Timor-Leste (CVTL) no parte relevantes seluk mós fó ona apoiu umanitária hanesan ba ninia família hodi sustenta uma-laran.
Kona-bá pensaun idozu no invalidéz ne’ebé maka MSSI, nia hateten família ne’e seidauk simu tanba ninia oan laiha kartaun eleitorál no BI hodi rejista iha Ministériu Solidaridade Sosiál no Inkluzaun munisípiu Ainaru hodi hetan apoiu.
“Problema boot mak Sabina Bianco Xavier seidauk iha dokumentu legál hanesan Kartaun Eleitorál no Bilete Identidade,”tenik tan.
Iha tempu hanesan Joanina de Araújo, konfesa hakarak kontinua ninia estudu no buka servisu hodi sustenta sira-nia família ne’ebé maka durante ne’e dependensia maka’as ba apoiu aihán husi família no viziñu sira.
Nia konta tuir katak sira-nia inan mate tinan barak ona tanba ne’e tenke foti responsabilidade hanesan inan hodi kuidadu ninia bin ne’ebé sofre problema defisiénsia fizika ne’ebé oras ne’e halo ona tinan 30.
“Hau sente triste tanba ama husik hela ona ami, maibé kona-ba hau-nia Bin Sabina Bianco Xavier ne’ebé ho kondisaun defisiénsia, ami nafatin simu ho laran-moos tanba nia mak ami-nia bin rasik. Ami labele husik nia no labele entrega ba ema seluk,” dehan Joanina de Araújo
Hatan ba pedidu ne’e, Asesór Sosiedade Sivíl no Asuntu Sosiál, Quintiliano Moniz Carvalho, hateten Prezidensia Repúblika sei koordena ho ministériu relevantes atu prosesa subsídiu invalidéz nian ba Sabina Bianco Xavier.
Jornalista : Francisco Sony
Editór. : Florencio Miranda Ximenes
