OEKUSI, 15 Juñu 2026 (TATOLI) – Ekipa Fundasaun Ran Amigu Karidade Timor-Leste (FURAK-TL), tulun kbiit-laek sira hamutuk na’in-29 iha Rejiaun Administrativa Espesiál Oekusi Ambeno (RAEOA) ho nesesidade bázika hanesan foos, mina no seluktan.
Prezidente FURAK-TL, Januario Soares, informa, fundu ba atu apoia nesesidade hirak-ne’e, mai husi nasionalista timoroan sira-ne’ebé iha laran-di’ak atu atu tulun família sira-ne’ebé identifikadu nu’udar vulneravel tebes.
“Ita apoia ba família 29 ne’e hanesan nesesidade bázika, apoia ne’e ita hetan apoia mai husi maluk timoroan sira-nia laran-di’ak atu tulun ba família sira-ne’ebé presiza tebes, ne’ebé la’ós ho volume bo’ot maibé apoia simples de’it, atu hakman família sira-nia terus no susar, hodi utiliza ba nesesidade uma laran,” nia hateten iha suku Lifau Oekusi, foin lalaís ne’e.
Olga dos Reis Soares husi bairru Sikluli suku Costa nu’udar Benefisiáriu, senti orgullu tanba durante ne’e moris mesak ho nia ida de’it, lorloron tenki ba ajuda ema seluk, hanesan fase ropa, depois to’o fulan mak selu, hodi uza osan ne’e atu atende nesesidade família no apoia oan nia nesesidade eskola nian.
“Senti kontente tanba maun sira mai ajuda ha’u hodi fó ai-han hanesan foos, mina no nesesidade seluktan, ha’u husu obrigadu,” nia orgullu.
Benefisiáriu, Domingas Colo, husi bairru Oéfoko uku Bobokase, “Ha’u-nia oan na’in-rua eskola hotu, araska tebes, kuandu hetan apoia hanesan ne’e, pasti laran kontenti maske apoia ne’e simples de’it maibé hakman ona ha’u-nia sofrimentu iha uma laran, tanba foos saka ida, ha’u bele sukat ho oan sira bele sustenta to’o fulan ida, depois iha osan uza fali buat seluk, tanba durante ha’u moris halo de’it taís hodi faan atu buka osan,” nia hateten.
Notísia relevante:Laran-triste nakfilak ba esperansa: Inan-faluk Juliana simu “uma di’ak” ho matan-been
Benefisiáriu Angelo da Costa, husi aldeia Umenoah suku Cunha, “Ha’u-nia serbisu maka lorloron ajuda de’it, kuandu ema presiza ha’u, hanesan sa’e ku’u nú, taa ai-maran apoia halai natar, ida-ne’e maka ha’u iha forsa no fontes prinsipál buka osan, atu responsabiliza ha’u-nia oan na’in-rua, kuandu ohin hetan tan apoia hanesan ne’e senti kontenti, tanba ema atu fó foos saka ida ho nesesidade sira hanesan ne’e, só laran Maromak, ou ha’u serbisu karik kala loron haat ka lima mak foin ema fó foos saka ida,”
Jornalista: Abílio Elo Nini
Editór: Rafael Ximenes de A. Belo
