DILI, 15 Juñu 2026 (TATOLI)—Selesaun Nasionál Alemaña Die Mannschaft lulun Coração ho festa golu 7-1 iha Grupu E, iha Kopa Mindiál FIFA 2026 ne’ebé hala’o iha Estádiu Houston, Houston, segunda madrugada.
Iha primeira parte, jogu ne’ebé lidera husi árbitru prinsipál Jalal Jayed husi Maroko ne’e, jogadór husi Alemaña loke jogu ho intensidade ne’ebé aas hodi halimar bola aas, ho intensaun atu bele prodús lalais golu.
Tama iha minutu neen (6), jogadór Felix Nmecha husi Alemaña hatama golu sedu, bainhira simu bola husi kruzamentu matenek husi Nmecha, hodi lansa xutu maka’as ba guarda-rede Coração rezulta golu 1-0 ba Jerman.
Maske jigante Europa ne’e halo presaun maka’as, maibé Coraçao la tauk no hatudu mentalidade luta. Iha minutu 21, L. Comenencia simu bola iha li’ur área penalidade nia sorin, lansa xutu ho distánsia dook no bola tama liu rede laran Alemaña rezultadu muda kedan ba 1-1. Golu ne’e halo jogu moris durante minutu 15 nia laran.
Maibé, Alemaña hatudu kualidade jogu hanesan manu-aman semo aas, nune’e jogadór Nico Schlotterbeck fó vantajen fila-fali iha minutu 38 hafoin bola barullu iha lina oin Coração nian, jogadór ne’e sa’e aas liu hotu hodi hatama bola ba rede Coração ho kabesa, rezultadu muda ba 2-1.
To’o tempu adisionál primeira parte minutu 45+5, mosu erru husi jogadór Coração ida, árbitru foti desizaun fó penalidade ba Alemaña, Jogadór Kai Havertz mak hetan konfiansa hodi sai ezekutadór hodi xuta bola no bola haknuuk an iha rede Coração nia hodi muda rezultadu ba 3-1 molok kaotu minute ikus ba primeira parte nain.
Tama ba segunda parte, Alemaña aumenta rítmu jogu. Jamal Musiala, jogadór idade nurak Jerman nian, aumenta tan golu hodi fura rede iha minutu 47 ho dribling brillante no xuta kruzadu bola tama liu rede Coração ho eskor 4-1.
Husi ne’e bao in, ekipa Alemaña halo presaun maka’as ba Coração. Jogadór N. Brown aumenta tan golu iha minutu 68, no Deniz Undav hakotu Coraçao nia esperansa iha minutu 78 ho golu ne’ebé mak barak liu iha Kopa Mundiál tina ne’e ho rezultadu 6-1.
Coração mós la nonook, sira tenta halo defensive no halo atake maibé ho velosidade ne’ebé mínimu kompara ho Alemaña ne’ebé joga hanesan kuda ne’ebé halai ho velosidade maka’as la sente kolen.
Golu seidauk para iha ne’e, basá Alemaña nia jogu nafatin brillante iha kampu laran, jogadór Kai Havertz hetan oportunidade iha minutu 88, taka Alemaña nia golu hodi lori nasaun ne’e lidera jogu 7-1 ba Alemaña. Golu ne’e mós hanehan golu ba dala 300 ba Alemaña iha istória Kopa Mundiál.
Ho vitoria 7-1 ne’e, Jerman mak iha pozisaun leten liu ba tabela kalsifikasaun Grupu E no fó alerta ba adversáriu sira seluk. Atake matenek, meiu kampu kriativu no defeza solidu halo sira sai kandidatu forte ba kampiaun. Iha parte seluk, Coraçao presiza hadi’a maka’as sira-nia defeza bainhira hasoru ekipa boot sira seluk iha grupu ne’e.
Jogu tuir mai Grupu E: Irlanda vs Ekuadór tuku 08h00 no Suedia vs Tunisia tuku 11h00 tuir oras Timor-Leste nian.
Ekipa Alemaña (4-3-1)
(1) Manuel Neuer, (6) Joshua Kimm, (4) Jonathan Tah, (15) Nico Schlotterbeck (18) N. Brown, (5) Aleksandar Pavlovic, (23) Felix Nmecha, (19) Leroy Sane, (10) Jamal Musiala, (17) Florian Wirtz* – Florian Wirtz, (7) K. Havertz.
Ekipa Coração (4-2-3-1)
(1) Eloy Room, (24) Denzel Fonville, (18) Ayrton Obispo, (23), Riechedly Bazoer, (5) Shermaine Floranus , (10) Leandro Bacuna, (21) Tahith Chong, (7) Juninho Bacuna, (8) Livano Comenencia, (12) Severino Hansen, (9) Jurgen Locadia
Jornalista : Hortêncio Sanchez
Editór : Cancio Ximenes
