DILI, 15 Juñu 2026 (TATOLI)—Universidade Katólika Timorense (UCT-sigla portugeza) São João Paulo II, sei reprezenta Timor-Leste iha Simpóziu Korál Universidade Katólika Ázia-Pasífika iha Hong Kong, Xina, ne’ebé lori membru koru hamutuk 34 hodi hatudu aprezenta sira-nia talentu muzikál no fó onra ba nasaun iha palku internasionál.
“Ami sei partisipa iha Simpóziu Koru nian iha Hong Kong. Ekipa sei aranka iha 15 no 16 Juñu tinan ne’e. Fila hosi Hong Kong iha loron 21 Juñu no to’o iha Timor-Leste iha 22 Juñu,” Reitór UCT, Frei Joel Casimiro Pinto, OFM, hateten ba TATOLI iha kampus UCT, Balide, Segunda ne’e.
Nia esplika katak delegasaun UCT kompostu husi ema na’in-34, inklui dirijente, pianista no kantór sira-ne’ebé fahe ba grupu lian haat: soprano, altu, tenor no baixu. Husi sira-ne’e feto na’in-22 no mane na’in-12.
Iha simpóziu, Koru UCT sei toka múzika neen ne’ebé maka prepara ho intensivu iha fulan balun liubá.
Tuir Frei Joel, UCT nia partisipasaun hetan ona apoiu husi parte oioin, inklui Ministériu Juventude, Desportu, Arte, no Kultura (MJDAK), Prezidénsia Repúblika no inan-aman husi estudante sira ne’ebé envolve iha koru ne’e.
“Ba finansiamentu, ami hetan ona apoiu hosi MJDAK, Prezidénsia Repúblika, no mós inan-aman hosi estudante sira,” nia hateten.
Nia hatutan, simpóziu ne’e sei partisipa hosi universidade lima hosi rejiaun Ázia-Pasífika, ho partisipante sira mai hosi Taiwan, Hong Kong, Timor-Leste no Filipina.
Antes ne’e, UCT hala’o ona konsertu pré-partida ho títulu “Road to Hong Kong” iha Salaun Nobel da Paz iha Kampus UCT Balide iha loron 11 fulan-Juñu, ida-ne’e hanesan parte ida husi preparasaun partida nian.
Konsertu ne’e hatudu repertoár tomak ne’ebé sei hala’o iha Hong Kong no fó oportunidade ba komunidade akadémika, Igreja no públiku en-jerál atu asiste diretamente abilidade husi estudante sira-ne’ebé sei reprezenta Timor-Leste.
Eventu ne’e hetan mós partisipasaun husi Kardeál Virgílio do Carmo da Silva, SDB, ne’ebé hala’o kna’ar mós nu’udár Magno Chancellor UCT nian, ka Konselleiru Onoráriu.
Portantu, Kardeál Virgílio hato’o nia apresiasaun ba dedikasaun husi estudante sira-ne’ebé konsege halo balansu ba sira-nia tempu entre estudu no pratika koru hodi prepara ba eventu internasionál ida-ne’e.
“Ha’u admira tebes ita-boot nia korajen no sakrifísiu. Ita-boot sira tenke estuda, maibé tenke fó mós tempu ba pratika. Iha fulan rua liubá, ita-boot sira pratika to’o iha pontu ida-ne’e, ha’u la’ós admira de’it, maibé ha’u mós fó parabéns ba ita-boot sira,” Kardeál Virgílio dehan.
Nia subliña, estudante sira-ne’e la’ós de’it lori naran UCT, maibé lori mós naran Timor-Leste iha palku internasionál.
“Ita-boot sira sei lori Timor nia naran sai prominiente liután iha-ne’ebá. Ha’u fiar ita-boot sira lori instituisaun nia naran no nasaun nia-naran iha eventu boot ida-ne’e, ha’u dezeja susesu ba ita-boot sira-nia atividade iha Hong Kong,” nia hateten.
Simpóziu Korál Universidade Katólika Ázia Pasífika nian maka halibur internasionál ida hosi koru sira hosi universidade Katólika sira iha rejiaun Ázia-Pasífika. Objetivu maka atu hametin amizade sira, haburas troka kulturál no hasa’e kualidade múzika igreja nian entre estudante sira.
UCT nia partisipasaun iha eventu ida-ne’e hein atu introdús kultura riku no talentu jerasaun foin-sa’e Timor-Leste nian ba komunidade internasionál enkuantu hametin pozisaun nasaun nian iha rede ensinu superiór Katóliku nia laran iha rejiaun Ázia-Pasífika.
Simpóziu Korál Universidade Katólika Ázia Pasífika (APCU) 2026 sei halibur kantór estudante liu 150 hosi universidade Katólika oioin iha rejiaun Ázia-Pasífika iha Hong Kong ho tema “Armonia iha Diversidade”. Simpóziu ne’e hakarak hasa’e kualidade múzika korál nian, hametin diálogu interkulturál, no aprofunda formasaun fiar nian hosi foin-sa’e sira iha ambiente ensinu superiór Katóliku nian.
Eventu ne’e sei iha konsertu litúrjiku, workshop, master class, palestra públika, ensaiu grupu no atuasaun kolaborativa ne’ebé envolve partisipante husi nasaun oioin.
Simpóziu ne’e mós sei konta ho figura prominiente oioin, inklui Monseñor José Luís Mariblanca, Xefe Misaun Estudu Santa Sé nian iha Hong Kong, no Felix Yeung, Diretór Múzika iha Katedrál São João iha Hong Kong, ne’ebé sei ko’alia kona-ba tema diversidade kulturál no espiritualidade múzika sagradu nian.
Aleinde ne’e, kompozitór no dirijente renomadu Japaun nian Ko Matsushita sei sai hanesan bainaka onra nian no líder artístiku, hodi prepara atuasaun kombinadu ida ba partisipante sira hotu.
Eventu ne’e sei konklui ho konsertu públiku ida iha loron 20 fulan-Juñu, ne’ebé hein atu atrai partisipante liu 1.000. Universidade sira-ne’ebé partisipa mak Fu Jen Catholic University husi Taiwan, De La Salle University Chorale husi Filipina, Universidade Católica Timorense (UCT) husi Timor-Leste, no St. Francis University Choir husi Hong Kong, hanesan uma-na’in.
Liuhusi atividade ne’e, organizadór sira iha esperansa atu hametin amizade, troka kulturál no kooperasaun entre universidade katólika sira iha rejiaun Ázia-Pasífika liuhosi múzika korál nu’udár meiu diálogu, unidade no hametin fiar.
Jornalista : Osória Marques
Editór : Xisto Freitas da Piedade
