DILI, 15 Juñu 2026 (TATOLI)—Iha Segunda (15 Juñu 2026) dadeer ne’e, oras Timor-Leste nian, selesaun nasionál husi kontinente Áfrika Osidentál Kosta Marfin doko Estádiu Philadelphia hodi hatohar Edkuadór (Kontinente Amérika Latina) nia delun liuhusi golu úniku 1-0 iha minutu 90, hodi rekolla pontu tolu (3) iha kopa Mundiál FIFA 2026.
Jogu ba ekipa rua husu grupu E lidera husi árbitru François Letexier husi nasaun Fransa. Bainhira jogu hahú, jogadór sira lansa kedan kontra no atake tuir ida-idak nia matenek hamus bola no matenek lori bola hodi bele rezulta golu.
Ekuadór foti inisiativa husi inísiu kedas. Moises Caicedo iha oportunidade atu xuta iha minutu daruak, maibé nia xuta bola halai sees husi baliza Kosta Marfim nian.
Enner Valencia estraga oportunidade osan-mean ida ba Ekuadór hodi marka golu iha minutu 11, maibé bola semo dook husi baliza Kosta Marfim nian.
Kosta Marfim iha vantajen uitoan hasoru Ekuadór hodi kria momentu perigozu oioin iha área Ekuadór nian. Iha minutu 24, defeza Kosta Marfim Emmanuel Agbadou halo sala hodi halimar hamaus bola ne’ebé kle’ur liu iha nia área rasik.
John Yeboah hasai bola la ho azitasaun, Yeboah lansa xuta ida ho ain-karuk husi área penalidade nia ninin, maibé kona de’it trave.
Kosta Marfim halo Ekuadór nervozu ho kontra-atake ida. Nicolas Pepe suta ho ain-karuk husi distánsia besik iha minutu 35 maibé hetan blokeiu husi defeza ekuatorianu.
Kosta Marfim lansa kontra-atake lalais ida iha parte karuk hafoin Bazoumana Toure simu pasajen naruk ida. Maibé, kruzamentu Toure nian ne’e sava husi husi guarda rede Hernan Galindez iha minutu 45.
Kosta Marfim lansa atake lubuk ida iha minutu ikus sira husi primeira parte. Wilfried Singo hasoru kruzamentu ida husi direta ho akrobátiku, maibé ida-ne’e hakat liu baliza ekuatorianu nian.
Parte dahuluk ramata lahó golu ruma, nune’e Ekuadór no Kosta Marfim tuun hemu bee ho rezultadu 0-0.
Tama ba segunda parte, ekipa rua kontinua lansa atake ba malu ho ambisaun atu rezulta golu maibé jogu la’o to’o minutu 88 nunka hetan rezultadu pozitivu tanba ekipa rua xave malu metin ho ida-idak nia estratéjia.
Ekuadór kuaze foti pontu hafoin aguenta to’o minutu ikus. Maibé iha minutu 90’, estratéjia sira hahú nakfera. A. Diallo hatudu nia kualidade hanesan matadór loloos. Nia simu bola iha área penalidade no marka tama liu ba rede Ekuador muda rezultadu ba 1-0. Golu ne’e halo Estádiu nakdoko ho lian hakilar makaas husi adeptu Áfrika sira.
Golu minutu 90’ ne’e la’os de’it golu vitória, maibé golu ne’ebé fó pontu tolu (3) krusiál ba “Elefante” Kosta Marfim iha Grupu E. Estádiu nakonu ho klamar husi fans Pantai Gading tanba sira konsege hetan vitória iha minutu ikus.
Vitoria 1-0 ne’e lori Kosta Marfim sa’e ba pozisaun daruak (2) iha grupu, liu Ekuador ne’ebé agora tuur iha pozisaun datoluk (3). Golu minutu ikus husi A. Diallo bele sai diferensa boot ba ekipa rua nia dalan atu tama ba 16-besar Kopa Mundiál 2026.
Kosta Marfim (4-4-2)
(1) Yahia Fofana, (17) Guéla Doué, (5) Wilfried Singo, (20) Emmanuel Agbadou, (3) Ghislain Konan, (19) Nicolas Pépé, (8) Franck Kessié, (6) Seko Fofana (11) Yannick Diomande, (12) Elye Wahi, (24) Bénie Traoré.
Ekuadór 3-4-3
(1) Hernán Galíndez, (3) Piero Hincapié, (6) Willian Pacho, (4) Joel Ordóñez, (15) Pedro Vite, (23) Moisés Caicedo, (21) Alan Franco, (14) Alan Minda, (9) John Yeboah, (13) Enner Valencia, (19) Gonzalo Plata.
Jornalista : Hortêncio Sanchez
Editór : Cancio Ximenes
