BAUKAU, 16 Juñu 2026 (TATOLI)—Konfederasaun Desportu Timor-Leste (CDTL-sigla portugeza) estabelese estrutura nivel munisipál iha Baukau.
Primeiru Vise-Prezidente CDTL, José Caetano Guterres esplika estabelesimentu CDTL nivel munisípiu referidu realiza ba dahuluk ho atividade hili estrutura ho objetivu atu dezenvolve desportu liuhusi baze tanba durante ne’e CDTL iha de’it pontu vogál no atuál eleva ba pozisaun prezidente hodi kontribui ba alta prestasaun desportu iha Timor-Leste.
“Ita hatene katak Munisípiu Baukau koñesidu ho prestasaun lakohi lakon no sempre hakarak kompete, tanba ne’e estabelesimentu ida-ne’e sai oportunidade atu kontribui hasa’e prestasaun atleta liuhusi desportu,” Vise Prezidente CDTL hateten iha Vila Antiga, Baukau, Tersa ne’e.
Josè Guterres relata CDTL iha vizaun hakarak desportu fó prestasaun ba Timor-Leste hafoin envolve iha ASEAN nune’e liuhusi atividade desportu iha munisípiu bele ativa ho Governu hanesan Ministériu Juventude, Desportu Arte no Kultura (MJDAK), Autoridade Munisipál no Ministériu Edukasaun nune’e futuru bele iha atleta nasionál ne’ebé hatudu prestasaun.
Aleinde ne’e, mekanizmu estabelesimentu CDTL Baukau liuhusi maneira asembleia ne’ebé hili liuhusi kandidatura pakote husi kada membru asosiasaun desportu iha Baukau hanesan diskute rejimentu no eleisaun ba estrutura hanesan Prezidente CDTL Munisípiu, Vise Prezidente, Prezidente Jurídiku, Komisaun Fiskál, Prezidente Asembleia ho Sekretáriu ho mandatu períodu ida (2026-2030).
“Ita espera estrutura foun bele akomoda asosiasaun hotu-hotu liuliu komunika ba malu ho di’ak, halo ligasaun ho entidade sira-ne’ebé interese di’ak hodi kontribui ba dezenvolve desportu iha fururu,” José Guterres akresenta.
Iha fatin hanesan, Pontu Vogál CDTL Baukau, João Cabral ‘Buka Tuir’ hateten durante tinan-barak asosiasaun desportu sira maioria abandonadu nune’e ho estabelesimentu referidu bele sai mahon no futuru organizadu liuhusi modalidade desportu iha Baukau.
“Ho estabelesimentu ida-ne’e futuru ita iha esperansa ba dezenvolvimentu desportu espesiál Baukau,” João Cabral hateten.
CDTL rasik estabelese ona estrutura nivel munisípiu hamutuk 13 iha-ne’ebé sei kontinua estabelese hodi finaliza Munisípiu Likisa iha tempu badak hodi kompleta estrutura nivel munisípiu hamutuk 13 iha territóriu nasionál.
Entretantu, totál membru asosiasaun desportu iha Baukau hamutuk 13 kompostu husi Asosiasaun Futeból Munisipál Baukau, Basketball, Volleyball, Xadres, Siklizmu, Tenis Meza, Taekwondo no seluk tan husi totál federasaun desportu nivel nasionál hamutuk 31.
Jornalista: Natalino Belo
Editór: Xisto Freitas da Piedade
