Parlamentu louva sidadaun hotu nia kontribuisaun ba mantein pás
DILI, 16 Juñu 2026 (TATOLI)-Deputadu Ricardo Baptista husi bankada Kongresu Nasionál Rekonstrusaun Timorense (CNRT, sigla portugés) louva timoroan hotu mantein pás hodi kontribui ba dezenvolvimentu país.
Nia hato’o apresiasaun ba Governu no povu tomak relasiona ho relatóriu Globál Peace Index ne’ebé semana kotuk fó sai katak Timor-Leste tama nasaun hakmatek iha pozisaun datoluk iha Asosiasaun Nasaun Sudeste Aziátiku (ASEAN, sigla inglés) no iha mundu tama iha 32.
“Ida-ne’e hakarak fó apresiasaun ba instituisaun sira no povu tomak. Ita hetan prestasaun index ida ne’e ita hothotu nia kontribuisaun”, nia hato’o liuhusi reuniaun plenária Parlamentu Nasionál, ohin.
Tuir nia, prestasaun ne’e la permanente no sei tún no sa’e, maibé ida1ne’e di’ak liu ona ba Timór no hein bele di’ak liután.
“Ho prestasaun ne’e bele tau atensaun ba mundu nian, oinsá mak Timór bele jere nasaun ne’e hodi ema hotu sente hakmatek iha ita-nia rai”, dehan.
Jornalista: Nelson de Sousa
Editora: Maria Auxiliadora
