DILI, 16 Juñu 2026 (TATOLI)—Diresaun Sosiedade Sivíl no Asuntu Sosiál, iha Gabinete Prezidénsia Repúblika, fó apoiu umanitáriu ba família vulneravel Leonarda Ximenes de Jesus, iha suku Komoro, postu administrativu Dom Aleixo, munisípiu Dili.
Apoiu umanitáriu ne’ebé Gabinte Prezidénsia Repúblika halo ne’e, tanba bazeia ba informasaun ne’ebé mídia fó sai kona-ba kondiasaun família ne’e nian, nune’e Prezidente Repúblika José Ramos-Horta orienta ekipa hotu tun fó apoiu.
Leonarda Ximenes husi suku Manlala, postu administrativu Soibada, munisípiu Manatutu, ne’ebé kaben ho ema Likisá maibé fahe malu ona, notdaudaun iha ona na’in-lima, ne’ebé aman la tau matan.
Bainhira simu tulun ne’e, Leonarda ho matan-been agradese tebes ba apoiu ne’ebé Gabinete Prezidente Repúblika fó ba nia, no husu Xefe Estadu atu tau matan ba nia oan sira-nia futuru, liuliu asesu ba edukasaun.
“Buat ne’ebé daudaun ha’u presiza tebes iha ha’u-nia moris ne’e mak husu Prezidente Repúblika nia ajuda haree ha’u-nia oan na’in-lima nia futuru de’it, no ajuda ha’u, fasilita ha’u, lori ha’u bá filafali ba hau-nia família iha Soibada”, Leonarda Ximenes de Jesus, hateten ba jornalista sira, ohin.
Nia dehan hanesan inan ida esforsu ne’ebé durante nia halo hodi hetan osan apoiu ba nia oan sira sona kerupuk no makaraun fa’an hodi sustenta sira-nia moris.
Koordenadora Servisu Sosiedade Sivíl no Asuntu Sosiál iha Gabinete Prezidénsia Repúblika, Teresa dos Santos Ximenes, hateten apoiu ne’ebé halo la’ós ba tempu naruk nian, maibé apoiu ne’ebé ba tempu badak nian. “Entaun, ohin ita lori foos, mina no osan uitoan fó ba ita-nia inan ne’e, maibé ba apoiu boot sira seluk ita sei informa fali ba Prezidente Repúblika mak foti desizaun”, Teresa dos Santos Ximenes, hateten.
Nia dehan kona-ba fasilita transporte ba família Leonarda ba Soibada, sira-nia parte prontu fó apoiu transporte hodi fasilita sira filafali bá Soibada.
“Kona-ba futuru labarik na’in-lima nian ami sei informa fali ba Prezidente Repúblika oinsá bele komunika ho Governu hodi haree futuru labarik na’in-lima ne’e nian”, nia dehan.
Iha fatin hanesan Xefe Suku Komoro, postu Adminsitrativu Don Aleixo, munisípiu Dili, Elígio Marcal, agradese tebes ba Prezidente Repúblika tanba bele apoiu ona família Leonarda.
Nia haktuir katak istória moruk ne’ebé Leonarda ho nia oan sira hasoru ne’e terus duni, tanba durante ne’e nia sempre bá hela de’it sede suku Komoro oinsá buka soluasaun ba ninia problema, tanba nia moris iha presaun laran no nia hakarak filafali bánia rai.
“Ha’u hanesan autoridade lokál apoia desizaun ne’ebé nia foti hakarak filafali ba ninia rai, maibé ha’u husu atu nia família ida mai hamriik mak sobu uma, nune’e nia filafali bá iha garantia ruma, la’e ta’uk mak ita sobu tiha uma ba maibé to’o iha ne’ebá la konkorda sobu uma ne’e”, nia dehan.
Jornalista: Arminda Fonseca
Editora: Maria Auxiliadora
