VIKEKE, 16 Juñu 2026 (TATOLI)—Xefe Suku Afaloikai, Postu Administrativu Uatukarbau, Munisípiu Vikeke, Abílio Soares, informa akontesimentu udan iha área rurál fó impkatu tebes ba presu sasán liuliu ba foos kilógrama 25 sa’e ba folin $18.50 no kilógrama 20 sa’e bá presu $16.5.
“Agora daudaun ne’e kondisaun klima udan nune’e karreta sira-ne’ebé lori nesesidade bázika sira labele asesu mai ami-nia Suku Afalokai. Entaun, folin foos sira-ne’ebé agora fa’an kioske sira iha ami-nia suku hanesan foos kilógrama 25 sa’e bá $18.5, kilógrama 20 folin $16.5. Ne’e difikulta ita-nia komunidade ne’ebé rendimentu ki’ik sira,” Abílio Soares ba TATOLI iha Postu Uatukarbau, Tersa ne’e.
Autoridade komunitária ne’e haktuir antes ne’e presu foos kilógrama 25 ho presu $15, kilógrama 20 $10.
Kona-ba sesesidade seluk hanesan mina-sona litru 1 uluk folin $1, maibé agora sa’e ba $1.25 no masin-midar la to’o kilograma ida, maibé presu $1.
Tanba ne’e, nia solisita Governu liuhusi Ministériu Komérsiu no Indústria (MKI) orienta Sentru Lojístika Nasionál (CLN-sigla portugeza) halo intervensaun ba presu foos iha Suku Afaloikai atubele hakmaan komunidade nia todan.
Tuir dadus, populasaun husi Suku Afaloikai ho totál populasaun hamutuk 1.874 husi uma-kain hamutuk 404.
Jornalista: Vitorino Lopes da Costa
Editór: Xisto Freitas da Piedade
