MALÁZIA, 16 Juñu 2026 (TATOLI)—Prezidente Repúblika, José Ramos-Horta, ho delegasaun partisipa lansamentu livru “The Rising Sun: Timor-Leste’s Journey to Peace and Development” ne’ebé hakerek husi Murni Wan Mohd Nord no Nurul Farhah Ab Aziz.
Prezidente Repúblika, José Ramos-Horta, hateten nia simu konvite espesiál husi Ministériu Negósiu Estranjeiru no Kooperasaun Malázia hodi partisipa lansamentu livru ida-ne’e.
“Iha lansamentu livru ne’e mós ami halo diálogu. Livru ne’e eskritór husi Ministériu Negósiu Estranjeiru Malázia Murni Wan Mohd Nor no Nurul Farhah Ab Aziz no sira halo entrevista ho líder rezisténsia sira iha Timor-Leste inklui Maun Xanana mós,” Xefe Estadu ne’e informa ba jornalista sira iha W-Otél Kuala Lumpur, Malázia, ohin.
Liivru ne’e sai hanesan matadalan ida ba Ministériu Negósiu Estranjeiru Malázia atu sira-nia diplomata bele lee hodi halo parte ida ba sira-nia formasaun, tanba livru ne’e hakerek husi ema ho grau doutoramentu no ida-ne’e sei iha impaktu di’ak ba Malázia.
“Livru ne’e mós ko’alia kona-ba jornada Timor-Leste durante tempu rezisténsia no to’o agora, liuliu pás no estabilidade hodi garante rekonsiliasaun,” Laureadu Prémiu Nobel da Paz ne’e esplika.
Líder nasionál ne’e hatutan, maske uluk tempu rezisténsia Timor-Leste iha inimigu ba malu hanesan nasaun Indonézia, maibé agora nasaun rua ne’e kria relasaun di’ak, tanba atu prevene konflitu no promove dame no seguransa internasionál ba ema hotu.
“Iha diálogu, ha’u partilla kona-ba realidade Timor-Leste no realidade pozitiva tuir klasifikasaun internasionál pás no seguransa ho perentajen 30%. Katak, nasaun ne’ebé iha situasaun pás no seguransa di’ak-liu kompara ho nasaun europeia sira seluk tanba ita laiha violénsia polítika, presaun ka violénsia étika,” nia hateten.
Jornalista : Alexandra da Costa
Editór : Cancio Ximenes
