DILI, 18 Juñu 2026 (TATOLI)—Adidu Edukasaun Timor-Leste iha Malázia, Hernâni Viterbo da Costa Soares, rejista estudante timoroan hamutuk 141 mak kontinua hala’o estudu ho grau akadémiku lisensiatura hamutuk 122 no mestradu hamutuk 19 iha universidade sira iha Malázia.
Husi totál estudante 141 ne’e kompostu husi bolsa kompletu hamutuk 99 (FDCH), bolsa parsiál hamutuk tolu (3) (MoU husi asosiasaun) no selu rasik hamutuk 39 (privadu).
“Ho kategoriasaun tolu ne’e, ida bolsa kompletu ne’e selu husi FDCH ka tuir programa Governu nian. Ida fali bolsa parsiál ne’e signifika universidade halo MoU ho asosiasaun musulmanu iha Timor, no ida selu rasik ne’e katak mai ho finansiamentu privada ka inan-aman mak selu rasik,” Adidu Edukasaun ne’e esplika ba jornalista liuhusi telefónika, ohin.
Nia hatutan, universidade ne’ebé timoroan sira eskola ba ne’e mak hanesan Asia Pacific University (APU), University of Technoligy Sarawak (UTS), Management and Science University (MSU), Albukhary International University (AIU), University of Kuala Lumpur (UNIKL), University Teknikal Malaysia Melaka (UTeM), University Malaysia Sabah (UMS), University Utara Malaysia (UAS), SEGI University & Colleges, Malaysian Allied Health Sciences Academy (MAHSA), University Colleges Sedaya International (UCSI), Limkokwing University, Sunway University, INTI International University&Colleges, Taylor’s University no Malaysian Armed Force Defence College.
Enkuantu papél prinsipál adidu edukasaun nian mak halo akompañamentu ba estudante sira, monitoriza progresu akadémiku no rezolve difikuldade ne’ebé estudante sira enfrenta iha rai-li’ur.
Koordenasaun institusionál hanesan hala’o enkontru ho parseiru lokál no FDCH hodi atualiza dadus kona-ba bolseiru sira.
Papél ida seluk mak halo diplomásia edukasionál atu implementa akordu bilaterál ne’ebé asina ona entre Timor-Leste no Malázia hodi hasa’e kualidade kapitál umanu.
Jornalista : Alexandra da Costa
Editór : Cancio Ximenes
