Governu kontinua halo diálogu ho komunidade afetadu 35 espansaun Aeroportu Komoro
DILI, 18 Juñu 2026 (TATOLI)—Governu liuhusi komisaun interministeriál ne’ebé kompostu husi ANATL, SEATOU, MOP, Terras Propriedade no ekipa PNTL, hala’o diálogu ho komunidade afetadu disputa rai na’in-35 ba prosesu espansaun Aeroportu Internasionál Nicolau Lobato (AIPNL) Komoro.
Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten enkontru ohin atu ko’alia kona-ba problema ne’ebé kona-ba espansaun aeroportu, nune’e ba maluk afetadu sira atu koopera ho Governu ba dezenvolvimentu konstrusaun nasaun nian.
“Prosesu alargamentu ida-ne’e ba interese nasionál ka sai odamatan boot ba ita hotu liuliu sai pontu entrada ba bainaka sira hodi mai partisipa ita-nia simeira ASEAN iha tinan 2028. Aleinde loke espasu ba ita-nia pista aeroportu nian, tanba agora daudaun ita-nia pista aeroportu badak,” Sekretáriu Estadu informa ba komunidade ha edifísiu ANTAL Komoro, ohin.
Governante ne’e dehan, husi parte Terras Propriedade aban sei fó tan notifikasaun ikus ho prazu loron 10 ba komunidade afetadu atu hamamuk fatin, tanba antes ne’e komisaun interministeriál fó tiha ona notifikasaun durante loron 90 maibé komunidade lakohi koopera nafatin.
Durante ne’e, nia dehan, iha de’it komunidade afetadu na’in-tolu (3) mak lori sira-nia dokumentu mai halo ajustamentu ba prosesu indemnizasaun.
“Entaun durante loron 10 ne’e komunidade bele sobu rasik hodi uza fali materiál sira. Ita-boot sira lakohi koopera tanba kestaun rai privadu, maibé Tribunál Rekursu deside tiha ona rai ne’e afavór ba Estadu,” nia dehan.
Nia husu ba advogadu bele lori sira-nia kliente kontinua halo rekursu ba rai iha Tribunál no bainhira sira manán mak Estadu sei nafatin selu komunidade afetadu nia rain, bele halo rekursu maibé labele impede prosesu dezenvolvimentu.
“Ita-boot sira hatene, bainhira ha’u-nia prezensa iha ne’e hodi servisu de’it tanba kompañia Waskita Karya atu ba halo servisu iha parte tasi ibun ne’e laiha espasu ba sira atu halo servisu,” nia dehan.
Nia hatutan, bainhira komunidade afetadussira-nia propriedade balun hanesan ai-horis no uma seidauk selu, bele konfirma ba parte relevante sira seluk tamba SEATOU nia prezensa atu halo servisu alargamentu de’it enkuantu notifikasaun ramata ona no komunidade labiban atu sobu uma, SEATOU prontu tuun hodi sobu.
“Tempu notifikasaun ramata mak Prezidente ANATL informa, entaun ha’u mai sei halo servisu no lori mákina ba sobu. Sasán sira ne’ebé ita-boot sira la konsege hasai sei konsidera hanesan patrimónia Estadu,” nia apela.
Prezidente ANATL, Romualdo da Silva, diálogu ne’e ho afetadu disputa rai na’in-57 maibé husi rma na’in-57 ne’e iha afetadu 38 mak to’o agora uma ho ai-horis seidauk selu, entaun iha notifikasaun loron 90 ne’e sai iha afetadu na’in-tolu (3) mak mai koopera hodi ajusta sira-nia dokumentu, entaun agora hela afetadu na’in-35 mak la koopera.
“Ha’u tenke ko’alia ho onestu, afetadu na’in-tolu ne’e ninia prosesu verifikasaun loos hotu ona no hein de’it adamentu ba pagamentu. Iha momentu ne’ebá mós ha’u sei estende tan to’o semana rua maibé afetadu sira nein ida atu mosu ba edifísiu ANATL,” nia dehan.
Afetadu na’in-35 ne’e to’o agora mós seidauk iha informasaun, maske dirijente ANATL informa ona ba auroridade lokál sira.
Komunidade afetadus na’in-35 ne’e hakarak Governu simu indemnizasaun pakote tolu ba rai, uma no ai-horis sira.
Jornalista : Alexandra da Costa
Editór : Cancio Ximenes
