DILI, 18 Juñu 2026 (TATOLI)-Komisaun F iha Parlamentu Nasionál, ne’ebé trata Asuntu Saúde, Igualdade Jéneru no Inkluzaun Sosiál, hakarak foti referénsia kona-ba implementasaun Lei Traballadór Doméstiku husi Filipina.
Prezidente Komisaun F, Maria Gorumali Barreto, hateten daudaun ne’e Komisaun halo hela konsulta hodi rona opiniaun husi entidade Governu, organizasaun feto, sosiedade sivíl no parseiru internasionál sira ba ezbosu Lei Traballadór Doméstiku.
Tanba lei ne’e mós kompleksu uitoan no Komisaun tau ona planu sei halo estudu komparativu iha nasaun membru Asosiasaun Nasaun Sudeste Aziátiku (ASEAN, sigla inglés), liuliu bá Manila- Filipina, iha tinan ne’e nia laran.
“[Tanba sira] iha lei, mekanizmu ba tratamentu no protesaun ne’ebé di’ak ba traballadór doméstiku ne’ebé ho dignu”, nia hateten.
Ho intensaun husi lejizladór nian atu prodús lejizlasaun ida ho kualidade bainhira iha implementasaun fó duni benefísiu ba povu.
Deputada ne’e dehan traballadór doméstiku durante ne’e serbisu ho ilegál, tanba laiha kontratu la respeita ba sira-nia oras serbisu, tempu foti feriadu no dalaruma hala’o serbisu uma laran hetan violénsia doméstika no abuzu seksuál. Tanba ne’e tempu ona atu haree lei ne’e.
Jornalista: Nelson de Sousa
Editora: Maria Auxiliadora
