DILI, 18 Juñu 2026 (TATOLI)—Selesaun Nasionál Portugál fahe pontu ho Selesaun Nasionál RD Kongo empata 1-1 iha jogu dahuluk Grupu K Kopa Mundiál 2026, Kinta (18 Juñu 2026) iha tuku 02h00 madrugada oras Timor-Leste nian, iha Estádiu Houston, Texas, Amérika.
Golu husi Portugál prodús husi João Neves iha minutu neen (6), maibé hafoin ne’e Koko resposta iha minutu 45+5 liuhusi kabesa husi Yoane Wissa. Fitun famozu husi Portugál, Cristiano Ronaldo kiuk (mandul=la hatama golu) iha jogu ne’e no piór liu nunka hetan oportunidade xuta bola ba guarda rede Kongo nian.
Jogu ne’ebé lidera husi árbitru Abdulrahman Al-Jassim husu nasaun Qatar ne’e, Porrtugál hahú ho halo presaun ba Kongo no bola iha de’it liña oin RD Kongo nian.
Ho presaun ne’ebé Portugál halo, fó duni rezultadu, nune’e konsege marka golu iha minutu neen, bainhira bola pasa husi Pedro Neto hetan uluk husi João Neves ho kabesa. Neves nia kabesa tama direta ba kuadru karuk guarda-redes Lionel Mpasi nian no rezultadu muda ba 1-0.
Maske sofre ona golu ida, Kongo la nonook, kontinua responde ho esperansa ba atake ne’ebé Portugál halo ba sira.
Jogu la’o ho intensidade aas, Portugál la para ataka hafoin avansadu, Nuno Mendes kria ameasa tan iha minutu 18 liuhusi nia jogu individu tama iha área penalidade, maibé nia lakon kontrolu bola to’o uluk guarda-rede Mpasi nia liman bele salva.
Portugál kontinua domina jogu. Enkuantu ne’e, RD Kongo sei susar atu dezenvolve jogu to’o minutu primeira parte besik atu termina.
Jogadór Kongo mós hetan oportunidade iha minutu ikus liuhusi jogadór Edo Kayembe tenta fó ameasa liuhusi suta distánsia dook. Maibé nia suta ne’e hetan blokeu no fasíl ba guarda-rede Portugál Diogo Costa salva iha minutu 33.
Portugál lakon konsentrasaun iha minutu ikus primeira parte. Pase husi Arthur Masuaku ba Yoane Wissa ne’ebé livre de’it iha oin área penalidade, Wissa nia kabesa rezulta golu iha +5. Golu ne’e taka jogu primeira parte ho eskor 1-1.
Hafoin intervalu, Kongo agresivu liu iha sira-ia jogu hodi la fó fatin ba Portugál atu hatama golu tuir sira nia hakarak. Jogu hetok la’o maka’as liu, neineik ba neineik Portugal hahú konsege domina Kongo maibé la prodús golu.
Jogu la’o ho ritmu maka’as maibé la hetan oportunidade golu, Portugál liuhusi niabtreinadór hatama fali jogadór suplente Francisco Conceição fó duni vantajen ba Portugál nia lina direta. Conceição konsege halai tama ba kuadru penalti no halo kruzamentu bola ba kotuk.
Fitun Ronaldo konsege simu bola kruza ne’e lansa xutu maibé nia xutu ne’e sai sees husi tore guarda-rede iha minutu 68.
Situasaun hanesan akontese tan iha minutu 74. CR7 lakon fali oportunidade ho nia xutu simu pasa krusamentu husi Conceição sai aas fali no la kona iha alvu.
Portugál hahú domina hikas bola. Bruno Fernandeslansa xutu maka’as husi dook iha minutu 89 maibé nia xutu ne’e nafatin la kona alvu.
Jogu la’o to’o minutu 90 termina, adisionál tan minutu lima (5) laiha tan jogadór ida mak prodús golu no jogu termina 1-1, nune’e ekipa rua fahe de’it pontu ba malu.
Husi rezultadu ne’e, Kongo mak provizóriu lidera tabela klasifikasaun ho pontu ida, tuir Portugál hodi hein jogu entre Colombia ho Uzbekistan iha orsida tuku 11h00 otl.
Portugal: (4-2-3-1)
Diogo Costa; Joao Cancelo, Henrique Araujo, Renato Veiga, Nuno Mendes; Joao Neves, Vitinha; Bernardo Silva, Bruno Fernandes, Pedro Neto; Cristiano Ronaldo.
RD Kongo: (5-3-2)
Lionel Mpasi; Aaron Wan-Bissaka, Mbemba, Axel Tuanzebe, Arthur Masuaku; Samuel Moutoussamy, Ngal’Eyel Mukau, Edo Kayembe; Yoane Wissa, Cedric Bakambu.
Jornalista : Hortêncio Sanchez
Editór : Cancio Ximenes
