BAUKAU, 19 Juñu 2026 (TATOLI)–Ekipa validasaun liuhusi Konsellu Kombatente Libertasaun Nasionál hahú halo validasaun ba lista reklamante no kontestasaun kombatente iha Rejiaun II (Vikeke no Baukau).
Komisáriu Rejiaun II Konsellu Kombatente Libertasaun Nasionál (CCLN-sigla portugeza), Domingos da Câmara ‘Amiko’, esplika atividade ne’e parte husi atividade kontinuasaun relasiona ho lista kombatente tinan-2009 ne’ebé hato’o reklamasaun no kontesta tanba problema tinan dedikasaun luta ba ukun rasik-an.
“Agora ne’e validasaun ba veteranu sira-ne’ebé ekipa sira halo ona rejistu no verifikasaun ba dadus ne’ebé taka sai ona maibé balun deskontente no halo reklamasaun,” Amiko informa ba TATOLI iha edifisiu CMCLN Vila Antiga, Baukau, Sesta ne’e.
Amiko relata validasaun ba lista reklamante sira-ne’e lidera direta husi CCLN Nasionál hamutuk ho CMCLN munisípiu rua iha-ne’ebé sei deside bazeia ba kritéria ne’ebé estabelese ona husi Ministériu Kombatente Libertasaun Nasionál (MCLN-sigla portugeza).
Ekipa validasaun kompostu husi responsavel klandestina no veteranu kompostu husi nasionál no reprezentante munisípiu iha na’in-ualu ne’ebé sei hala’o serbisu durante fulan-ida hahú husi loron-15 Juñu no sei termina iha fulan Jullu, hanesan iha Baukau loron-30 enkuantu Vikeke loron-20 ne’ebé tuir kada postu administrativu.
“Ha’u mai atu estabelese regra, la haree ba ameasa maibé haree ba pesoál nia luta bazeia ba regra,” Amiko akresenta.
Eis gerilleiru ne’e salienta prezensa iha komisaun atu estabelese regra hanesan onestu tanba ruin no raan mak sosa liberdade tanba bainhira kontra regra presiza prosesa to’o nasionál bazeia ba lei ne’ebé eziste iha Timor-Leste.
Tuir rekizitu, pesóal kombatente ne’ebé partisipa maibé la kaer kilat iha ai-laran, la desterradu, detein mezmu kontribui tinan 20 presiza verifika hodi Governu rekoñese ho medalla no sertifikadu.
“Maibé situasaun atuál maioria lakohi sertifikadu ka medalla maibé hakarak osan, enkuantu futuru bainhira mate buat ne’ebé hela ba oan atu konta mak medalla ho sertifikadu,” Amiko argumenta.
Entretantu, tuir dadus, lista validasaun husi Rejiaun II hamutuk 16.083 kompostu husi Munisípiu Baukau 9.333 no Vikeke 6.750.
Jornalista: Natalino Belo
Editór: Xisto Freitas da Piedade
