DILI, 19 Juñu 2026 (TATOLI) – Komité Olímpiku Nasionál Timor-Leste (CONTL, sigla portugés) organiza Aichi-Nagoya Asian Games Fun Run International, atu promove desportu, amizade no unidade iha ázia.
Atividade Fun Run ne’e sei hala’o iha loron 20 Juñu, hahú iha tuku 6h00 dadeer, rute husi GMT, Banku Mandiri, R. São Sebastião, Ministériu Justisa, Ótel Timor, Tugu Pramuka, Dilicious Timor, Embaixada Portugál, Palásiu Governu hodi fila hikas bá GMT.
Sekretáriu-Jerál CONTL, Laurentino Guterres, orgullu hodi organiza eventu ida ne’ebé halibur atleta, estudante no amante desportu sira, reprezentante Governu no membru komunidade atu hamutuk selebra jogu Aziátiku Aichi-Nagoya 2026 iha Japaun.
Enventu ne’e nia objetivu mak atu promove valór sira husi jogu aziátiku, enkoraja moris saudavel no ativu, hametin amizade, solidariedade no kooperasaun entre povu sira iha ázia.
Eventu ida-ne’e mós sai oportunidade importante atu hasa’e konxiénsia kona-ba partisipasaun Timor-Leste iha jogu aziátiku no inspira jerasaun foun atleta timoroan sira.
“Jogu aziátiku la’ós deit kompetisaun desportiva. Jogu ne’e reprezenta unidade, eselénsia, respeitu no amizade entre nasaun sira. Liuhusi Fun Run ida-ne’e, ita selebra valór hirak ne’e no reafirma Timor-Leste nia kompromisu ba dezenvolvimentu desportu no juventude,” nia hateten, liuhusi konferensia imprensa iha ótel Timór, ohin.
Hodi afirma katak hanesan nasaun joven ida iha ázia, Timor-Leste kontinua uza desportu nu’udar instrumentu importante atu promove dezenvolvimentu sosiál, inkluzaun no envolvimentu internasionál. Partisipasaun iha jogu aziátiku fó oportunidade ba atleta timoroan sira atu kompete hamutk ho atleta mellór sira iha ázia, hetan esperiénsia valioza no lori bandeira Timor-Leste ho orgullu iha palku kontinentál.
Fun Run ne’e sei inklui partisipasaun komunidade, aprezentasaun kulturál no atividade sira atu promove saúde, aptidaun fízika no dezenvolvimentu desportu.
“Ema hothotu la haree ba idade, konvida atu partisipa no hatudu sira-nia apoiu ba atleta Timor-Leste no ba espíritu jogu aziátiku”, nia apela.
Prezidente Komité Olímpiku Nasionál Timor-Leste agradese ba Komité Olímpiku Ázia, komisaun organizadora Jogu Aziátiku Aichi-Nagoya, instituisaun governamentál, parseiru sira, apoiadór no voluntáriu sira ho partisipante hotu ne’ebé fó kontribuisaun importante ba susesu eventu ida-ne’e.
“Hamutuk ita halai ba amizade, unidade, eselénsia no futuru desportu iha Timor-Leste no ázia”, nia hato’o.
Jogu Asian Games Aichi-Nagoya sei realiza iha Japaun iha loron 19 fulan-Setembru to’o 04 Outubru tinan 2026. Eventu ne’e sei halibur atleta rihun husi nasaun aziátika sira iha eventu multidesportu ida ne’ebé boot liu iha mundu.
Jogu ne’e promove troka kulturál, entendimentu mútuo no kooperasaun entre nasaun partisipante sira.
Jornalista: Nelson de Sousa
Editora: Maria Auxiliadora
