BAUKAU, 19 Juñu 2026 (TATOLI)—Eventu Festivál Kulugisa ba daruak ne’ebé realiza durante loron rua ho objetivu hakarak kria dame liuhusi arte no múzika iha Munisípiu Baukau.
Prezidente Komisaun Organizadora Festivál Kulugisa, João Marques Viegas da Silva ‘Jhony Cheque’, esplika Festivál Kulugisa inisia husi joven husi Baukau-oan ho hanoin hakarak fó espasu ba foin-sa’e hotu hodi espresa talentu liuhusi arte hanesan pintura, deportu no múzika iha-ne’ebé kontribui ba pás no estabilidade tuir tema festivál katak ‘Dame Hahú Husi Ha’u’.
“Sentidu husi tema ‘Dame Huhú Husi Ha’u’ iha sentidu katak joven ida tenke hatene ona kona-ba simu no fó dame liuhusi asaun festivál nune’e buka serbisu hamutuk inklui organiza an halo planu no hatudu kapasidade ho asaun espresa talenta,” João informa ba TATOLI iha Vila Antiga, Sesta ne’e.
Jhony Cheque relata Festivál Kulugisa ba daruak ne’ebé sei realiza durante loron-rua ne’e ho atividade konsertu múzika, jogu futeból U-40, Futumanu, pinta, parade motór King no feira ne’ebé organiza husi Juventude Interese Timor Unidade (JINTIU) no Sentru Juventude Munisipál Baukau (CJMB-sigla portugeza).
Aleinde ne’e, eventu referidu hetan apoia fundu husi Governu liuhusi Sekretaria Estadu Arte no Kultura (SEAK), kontribusaun voluntária husi emprezáriu no indivíduu Baukau-oan, komunidade JINTIU iha diáspora no patrosinadora seluk liuhusi apoiu materiál husi Autoridade Munisipál Baukau (AMB), Konsellu Munisipál Kombatente Libertasaun Nasionál (CMCLN-sigla portugeza) no seluk tan ho kalkulasaun kustu hamutuk rihun $7.
“Agora seidauk atinje rihun $7 maibé eventu ida-ne’e realiza laos haree de’it ba apoia husi Governu maibé kontribui mós husi inan-aman, maluk Baukau-oan tantu orsamentu, matérial no morál,” Cheque akresenta.
Eis drumer banda JINTIU ne’e salienta objetivu seluk mak akumula hamutuk Baukau-oan ne’ebé durante ne’e namkari nune’e krexe kriatividade juventude iha área arte no múzika ho esperansa preparasaun ba desentralizasaun podér lokál iha asuntu kapasidade rekuru umanu liuliu kria pás no estabilidade iha Baukau.
Entretantu, Festivál Kulugisa ba daruak sei hala’o nia abertura liuhusi atividade ba loron dahuluk iha Sesta (19/06/2026) hanesan konsertu múzika ne’ebé maihusi banda sira hanesan Infernu, Galaxy, JINTIU, De-Gladiator, Noinina, Lafaek Color, Vircoustik no seluk tan, enkuantu pintura sei aprezenta husi Arte Moris no Tatto War.
Aleinde ensera ho konsertu múzika, atividade ba loron daruak sei realiza mós jogu futeból U-40 iha Estádiu Munisipál Tadeo Laikana entre ekipa Baukau Legend, Rusa Fuik, Muacau United no Legend Kristu-Rei. Seluk mak parade motór husi grupu Ninja King no jogu futu-manu Baukau iha loron-Sábadu (20/06/2026).
Jornalista: Natalino Belo
Editór: Xisto Freitas da Piedade
