Governu aprova Planu Asaun Nasionál ba Indústria Transformadora
DILI, 19 Juñu 2026 (TATOLI)-Konsellu Ministru aprova projetu rezolusaun Governu, ne’ebé aprezenta husi Ministru Komérsiu no Indústria, Filipus Nino Pereira, kona-ba Planu Asaun Nasionál ba Indústria Transformadora.
Ministru Komérsiu no Indústria, Filipus Nino Pereira, esplika katak planu ne’e estabelese medida sira lubuk ida ho objetivu atu promove dezenvolvimentu indústria transformadora iha Timor-Leste, nune’e bele kontribui ba diversifikasaun ekonómika, redusaun dependénsia ba reseita petróleu no gás, nomós hametin kompetitividade setór privadu nian.
“Planu asaun ne’ebé ita aprezenta ida-ne’e bazeia ba politíka nasionál dezenvolvimentu indústria ne’ebé aprova tiha ona iha Novembru 2023. Presiza mós iha Planu Asaun Nasionál ida atu difine ita-nia polítika implementasaun ho liña koordenasaun interministeriál atu haree dezafiu ba dezenvolvimentu indústria transformadora iha nasaun ida-ne’e ho oportunidade saida maka ita iha, liuliu agorindústria”, Nino Pereira hateten ba Tatoli hafoin ramata Konsellu Ministru iha Ministériu Finansa, ohin.
Nia subliña Planu Asaun Nasionál ne’e importante tebes tanba ida-ne’e sai pontu prinsipál Governu hatuur iha Planu Asaun Dezenvolvimentu Indústria Manufatureira, nune’e Governu iha ona vizaun ida klara ba pasu pur pasu atu implementa.
Nia dehan husi Planu Asaun Anuál ne’e entre prioridade sira ne’ebé identifika maka valorizasaun no transformasaun ba produtu nasionál sira ne’ebé iha poténsia ba esportasaun, liuliu produtu agríkola, floresta no peska nian, hadi’a ambiente negósiu, hasa’e asesu ba finansiamentu nomós esforsu ba atrasaun (dada) investimentu privadu.
Atu apoia implementasaun planu ne’e, sei kria komisaun interministeriál ida ne’ebé responsavel ba koordenasaun, monitorizasaun no avaliasaun ba medida sira ne’ebé prevee ona.
“Inisiativa ida-ne’e, objetivu mak atu hasa’e produsaun nasionál, kria empregu, aumenta esportasaun, no mós hametin integrasaun ekonomia Timor-Leste nian iha merkadu rejionál no internasionál”, nia konklui.
Jornalista: Arminda Fonseca
Editora: Maria Auxiliadora
