Kondisaun estrada Loes–Lissadila grave, prejudika movimentu atividade ekonomia komunidade
LIKISÁ, 19 Juñu 2026 (TATOLI) — Xefe Suku Lissadila, Fernando Lobo, hamutuk ho komunidade no estudante sira, husu ba Governu liuhosi Ministériu Obras Públikas (MOP) atu halo rehabilitasaun ba estrada husi Loes ba Suku Lissadila ne’ebé atualmente ho kondisaun grave no difikulta movimentu transporte no atividade ekonómika komunidade.
Fernando dehan kondisaun estrada ne’e sai preokupasaun boot ba komunidade tanba durante tempu udan, bee mota sae no estrada nakonu ho tahu, hodi impede movimentasaun transporte públiku.
“Ami husu ba Governu liuhosi Ministériu Obras Públikas atu hadi’a estrada ne’e hodi fasilita movimentu transporte no ajuda komunidade hala’o atividade ekonómika ho di’ak,” dehan Fernando Lobo ba TATOLI iha Sede Suku Lissadila.
Nia esplika maioria komunidade iha Suku ne’e depende ba setór agrikultura atu sustenta moris. Tanba ne’e, asesu estrada ne’ebé di’ak importante atu fasilita transportasaun produtu agríkola ba merkadu.
“Karik estrada di’ak sei ajuda sira tula produtu ba merkadu, aumenta rendimentu família no apoiu edukasaun ba oan sira,” hateten nia.
Xefe Aldeia Cai-Cassa, Américo da Silva Soares, reforsa katak lideransa lokál sira hato’o ona proposta ba Ministériu Obras Públikas atu halo normalizasaun no reabilitasaun ba Estrada ne’e, maibé to’o agora seidauk hetan resposta konkretu.
“Distánsia husi Loes to’o Suku Lissadila besik kilómetru 30. Durante fulan Janeiru to’o Marsu, transporte sira dala barak labele liu tanba bee mota sae,” dehan Américo.
Preokupasaun hanesan mos hato’o husi estudante Eskola Básika Filial (EBF) Samodo, Arona Maia, ne’ebé reprezenta estudante sira iha suku ne’e.
“Dala barak professor sira suspende aula durante loron rua ka tolu tanba bee mota sae. Situasaun ida-ne’e prejudika ami nia prosesu aprendizajen,” dehan Arona.
Entretantu, Administradór Postu Administrativu Loes, Francisco Xavier dos Santos, informa katak projetu reabilitasaun estrada husi Loes ba Suku Lissadila tama ona iha faze tenderizasaun no implementasaun sei realiza iha 2027.
“Ami simu ona informasaun katak estrada husi Loes to’o Lissadila tama ona iha fase tenderizasaun. Kompañia nasionál no lokál balu tuir ona prosesu ne’e, no kompanhia manan projetu ne’e sei halo reabilitasaun Estrada ne’e tinan oin,” dehan Francisco.
Jornalista: Camilio de Sousa
Editór: Filomeno Martins
