MTK aprezenta progresu serbisu dezenvolvimetu AIPNL ba Konsellu Ministru

DILI, 19 Juñu 2026 (TATOLI) – Ministru Transporte no Komunikasaun, Miguel Marques Manetelu, ho ekipa aprezenta kona-ba progresu serbisu dezenvolvimentu no espansaun Aeroportu Internasionál Prezidente Nicolau Lobato (AIPNL) Komoro, Dili, ba Konsellu Ministru.

Projetu ne’ebé dezenvolve iha parseria ho Banku Aziátiku Dezenvolvimentu (ADB), Ajénsia Kooperasaun Internasionál Japaun nian (JICA) no Governu Austrália liuhusi Australian Infrastructure Financing Facility for the Pacific (AIFFP), inklui modernizasaun ba pista, taxiways, área estasionamentu ba aviaun, torre kontrolu, terminál pasajeiru nian no infraestrutura apoiu oioin, ho investimentu totál revistu maizumenus millaun $239.

Nia esplika katak aprezentasaun ne’e kona-ba prosesu serbisu no nia kompleksidade iha AIPNL ne’ebé iha. Nia kompleksidade mak iha sasán barak tanba aeroportu ne’e konstrui, maibé iha tempu hanesan operasaun la’o hela.

“Sira ne’ebé halo operasaun iha ne’ebá tenke muda husi fatin ida bá fatin ida hodi asegura katak sira fornese nafatin servisu ba aviaun sira ne’ebé tun-sa’e durante aeroportu halo konstrusaun. Informasaun sira ne’e mak ohin mai halo aprezentasaun atualiza ba membru Governu sira, tanba sira husu garantidu ka la’e iha 2028 konstrusaun ne’e termina. Ita hatán ministériu sei halo esforsu hotu ho ekipa ne’ebé serbisu ba aeroportu ne’e liuliu konsultór sira esforsu, nune’e termina tuir kalendáriu ne’ebé tau ona, tarde liu Maiu 2028″, Miguel Marques Manetelu hateten iha Ministériu Finansa, ohin.

Aleinde ne’e, Konsellu Ministru mós analiza aprezentasaun husi Diresaun-Jerál Terra no Propriedade kona-ba pontu situasaun hosi prosesu jestaun terrenu no imóvel Estadu nian, ho hanoin atu harii embaixada ba nasaun ASEAN sira balun no halo reabilitasaun ba Aeroportu Internasionál Prezidente Nicolau Lobato.

Informa mós katak indemnizasaun kona-ba rai okupadu ne’ebé presiza ba konstrusaun embaixada sira no reabilitasaun aeroportu internasionál sei finansia liuhusi Fundu Infraestrutura.

Nia subliña katak Terra no Propriedade hamutuk ho Sekretaria Estadu Asuntu Topononímia no Organizasaun Urbana (SETOU) no Ministériu Obra Públika hato’o ona informasaun ba komunidade afetada uma-kain 35 ne’ebé to’o agora seidauk hakarak husik fatin ne’e.

Nia esplika katak prosedimentu hotu la’o tuir mekanizmu legál ne’ebé estabelese. Maski nune’e, uma-kain 35 ne’e kontinua lakohi sai. Nia hateten katak durante diálogu iha 2025, ministériu la’o tuir desizaun husi tribunál nian no labele foti desizaun.

“Prosesu jurídiku la’o oinsá, ami bele la’o tuir tanba osan atu selu ne’e iha, maibé desizaun tribunál katak sira la’ós na’in ba rai. Ami labele bá selu, la;e ami viola lei. Entaun, ami akompaña notifikasaun fó ona fulan tolu, sai hahú iha 15 Janeiru to’o 15 Abríl. To’o horisehik fó espasu atu rezolve maibé la mai entaun Terra no Propriedade tuir lei fó tan notifikasaun durante loron sanulu, ita hein liu tiha loron ne’e halo ona despeju”, nia informa.

Jornalista: Arminda Fonseca

Editora: Maria Auxiliadora