Suisa lidera Grupu B hafoin halakon Bósnia 4-1
DILI, 19 Juñu 2026 (TATOLI) – Selesaun Nasionál Suisa hetan susesu halakon nia adversariu Bósnia no Herzegovina 4-1 iha jogu daruak Kopa Mundiál 2026 Grupu B nian, ne’ebé hala’o iha Estádiu Los Angeles, Estadu Unidu, iha Sesta (19 Juñu 2026) madrugada.
Vitória ida-ne’e dudu Suisa tur iha leten tabela klasifikasaun Grupu B Kopa Mundiál 2026 nian. Bósnia no Herzegovina, tur liu iha iha tabela nia okos, basá iha jogu dalarua la konsege gaña vitória.
Bainhira jogu hahú ekipa rua lansa kedan kontra no atake ba malu tuir tékniku no abilidade ekipa ida-idak nian oinsá bele prodús golu.
Suisa foti inisiativa hahú husi minutu dahuluk. Ekipa ne’ebé lidera husi Murat Yakin aplika presaun maka’as, hodi halo susar ba Bósnia atu dezenvolve sira-nia jogu.
Oportunidade dahuluk mosu iha minutu neen bainhira jogadór Dan Ndoye tama iha kaixa penalidade nian molok lansa suta ida ne’ebé maka’as. Maibé, bola ne’e la’o dook de’it hosi baliza Bósnia nian.
Iha primeira parte nia klaran, ekipa rua ne’e troka atake sira. Maibé, sira nafatin lakon bola no rezultadu la muda.
Bósnia hetan oportunidade osan-mean iha minutu 41. Edin Dzeko, simu pasajen ida iha kaixa penalidade nian, lansa kedas suta ida ne’ebé maka’as. Maibé, defeza Suisa nian hatudu disiplina no konsege blokeia bola. Ekipa rua la hetan golu to’o intervalu.
Muda ba segunda parte, ekipa rua nafatin lansa kontra-atake ba malu, Suisa ikus mai halakon Bósnia iha minutu 74. Johan Manzambi hatama bola ne’ebé di’ak ba iha kaixa penalti no lansa suta ida-ne’ebé maka’as halo guarda-rede Bósnia Nikola Vasilj la konsege kaer. Golu ne’e halo Suisa hetan vantajen 1-0.
Bósnia nia situasaun sai defisil liu tan hafoin sira lakon ema ida iha minutu 81. Tarik Muharemovic hetan kartaun mean ida tanba atake maka’as hasoru jogadór suisu ida iha kaixa penalidade nia oin.
Bosnia mehi aat iha jogu nia rohan, basá sira lakon bola barak no jogadór na’in-10 de’it laiha forsa adekuadu hodi satan Suisa nia kontra-atake.
Vantajen numérika fó liberdade liután ba Suisa atu ataka. Nune’e, Ruben Vargas duplika vantajen iha minutu 84 hafoin kaer metin pasajen ida hosi Breel Embolo. Vargas nia suta iha kantu kraik parte loos tama liu rede Bósnia nian halo Suisa manan 2-0.
La Nati kontinua prienxe no marka fali golu iha jogu nia rohan. Johan Manzambi marka nia golu daruak hafoin simu pasajen perfeitu husi Vargas iha kaixa penalidade. Nia suta ne’ebé kona duni alvu muda rezuktadu ba 3-0.
Bósnia nia jogu tun beibeik maibé konsege prodús golu, iha minutu 90+3 jogadór avansadu Bósnia Ermin Mahmic, hasoru bola iha kaixa penalidade nia laran ho suta ho velosiade maka’as halo guarda-rede Gregor Kobel la konsege hapara. Rezultadu 3-1
Maibé, Suisa taka jogu ho golu dahaat iha minutu 90+7. Árbitru fó penalti ida ba Suisa, basá jogadór Bósnia halo erru hasoru jogadór Suisa, oportunidade ne’e Granit Xhaka mak sai ezekutadór ikus golu ne’e taka vitória Suisa nian ho 4-1.
Vitória ne’e tau Suisa iha grupu B nia leten no loke posibilidade maka’as atu hakat ba faze leten liu. Entretantu, Bósnia no Herzegovina tenke hetan rezultadu pozitivu iha sira nia jogu tuir mai bainhira sira hakarak mantein sira-nia esperansa hodi hakat ba jornada tuir mai.
Suisa (4-3-3): Gregor Kobel, Silvan Widmer, Nico Elvedi, Manuel Akanji, Ricardo Rodriguez, Remo Freuler, Granit Xhaka, Michel Aebischer, Fabian Rieder, Breel Embolo, Dan Ndoye.
Treinadór: Murat Yakin
Bosnia no Herzegovina (4-3-3): Nikola Vasilj, Tarik Muharemovic, Sead Kolasinac, Amar Dedic, Nikola Katic, Benjamin Tahirovic, Ivan Sunjic, Amar Memic, Edin Dzeko, Kerim Alajbegovic
Treinadór: Sergej Barbarez
Jornalista : Hortêncio Sanchez
Editór : Cancio Ximenes
