DILI, 20 Juñu 2026 (TATOLI)–Embaixada Koreia iha Timor-Leste serbisu hamutuk ho Federasaun Taekwondo Timor-Leste (FTTL), Sábadu ne’e, realiza kompetisaun Koreia Embaixadór Taekwondo Cup 2026, ba kategoria Kyorugi no Poomsae hodi buka fini ba futuru.
Embaixadór Koreia mai Timor-Leste, Chang Ha Yeon, hateten, inisiativa ne’e atu dezenvolve Taekwondo iha Timor-Leste no fó oportunidade ba labarik timoroan sira atu hatudu no dezenvolve sira-nia talentu.
Atividade ne’e mós atu fortifika liután kooperasaun entre Koreia ho Timor-Leste, liuliu ba dezenvolvimentu desportu ne’ebé di’ak liután.
“Koreia hanesan nasaun ne’ebé orijen Taekwondo nian, entaun liuhusi atividade ida-ne’e bele fó oportunidade ba labarik timoroan sira la’ós apreende de’it kona-ba Taekwondo, maibé apreende mós kona-ba kultura Koreia,” Embaixadór hato’o hafoin halo abertura ba Embaixadór Taekwondo Cup, iha Jináziu Dili, Sábadu ne’e.
Iha biban ne’e, nia husu ba joven sira bainhira tuir atividade tenke hatudu disiplina no tane a’as valór umanu hodi hametin kooperasaun iha sosiedade.
“Ba futuru ita sei haree oinsá atu espanda mós atividade Embaixadór Taekwondo Cup ne’e ba munisípiu sira,” nia tenik.
Notísia relevante : MJDAK fasilita formasaun Antí-Doping ba atleta Taekwondo na’in-11
Nune’e mós, Prezidente Federasaun Taekwondo Timor-Leste, Gil Alvares, agradese ba Embaixada Koreia, tanba bele halo kooperasaun hodi organiza atividade ne’e.
“Eventu ne’e ita iha kategoria rua mak hanesan Kyorugi no Poomsae, nune’e ita prepara ba eventu Taekwondo Championship ne’ebe sei realiza iha Maliana,” nia katak.
Prezidente Federasaun ne’e husu atleta sira atu kontinua tuir eventu saida de’it mak organiza husi Embaixada no Federasaun hodi kontinua prepara-an ba kompetisaun sira.
Gil Alvares relata, atleta hamutuk 240 mak partisipa iha eventu ne’e mai husi munisípiu sira inklui Dili.
Aleinde ne’e, Ministru Juventude, Desportu, Arte no Kultura, Nelyo Isaac Sarmento, konsidera inisiativa ne’e hanesan espasu ida ba atleta Taekwondo atu apreende husi kiik molok bá idade boot.
“Ho inisiativa ida-ne’e ha’u fiar ba oin ita sei hetan atleta Taekwondo ne’ebé potensiál liu ba prestasaun nasionál nomós internasionál,” Ministru afirma.
Membru Governu ne’e kompromete, sei serbisu hamutuk ho Governu koreia atu fasilita formasaun ba treinadór no atleta sira.
“Aleinde ne’e, ita mós husu Koreia atu fasilita atleta ne’ebé ho prestasaun di’ak atu bá halo treinamentu ida-ne’e, meius ida, meius seluk mak ita husu Embaixadór atu fasilita sira-nia treinadór ne’ebé kualifikadu para mai fó formasaun ba ita-nia treinadór sira,” Nelyo Isaac, hato’o.
Tuir nia, treinadór Taekwondo ba kategoria Poomsae presiza tan hasa’e kapasidade, nune’e presiza kapasita sira hodi orienta atleta sira ho di’ak liután.
Entretantu, dajong sira ne’ebé partisipa iha eventu ne’e mak hanesan Dragon UNTL, IPDC, Cobra, UEP, lospalos,BJH, Baukau Sentrál, CAFE Baukau, UNITAL, Leão, Kuluhun, Maliana, Deltan, Loriko, matadoru, Koni,Wolf Tibar, Pura Girina,EGT, Falor, Becusse Paiol, Taibesse Leste,UNPAZ, 10 Dezembru no Sionál.
Jornalista : Osória Marques
Editora : Julia Chatarina
