DILI, 20 Juñu 2026 (TATOLI)–Estádiu Philadelphia, iha Sábadu dadeer oras Timor-Leste nian, barullu tanba sai sasin ba festa ekipa Samba Brazíl nia vitória.
Matheus Cunha jogadór brani liu, marka golu duplu iha minutu 23 no 36 hodi sobu defeza Haiti. Molok intervalu, Vini Júnior taka kurtina vitoria ho golu iha minutu 45+3’, hodi asegura pontu tolu iha jogu daruak grupu C Kopa Mundiál FIFA 2026.
Vitória ne’e tebes. Vitoria ne’e realidade hodi hatudu katak Brazíl la’ós ekipa fraku. Brazíl ekipa Samba, sira doko Philadelphia iha kalan oras Amérika nian. Sira hatudu katak sira la’ós partisipa maibé kompete.
Rezultadu ne’e hatudu mós katak, falla ho Maroko hodi fahe pontu ida-ida iha jogu dahuluk la’ós dezafiu, maibé esperiénsia hodi hakat. Ohin Brazíl hakat a’as kedan hodi lidera grupu C ho pontu haat hanesan ho Maroko maibé diferensa iha golu. Nune’e Maroko tenke okupa iha pozisaun daruak, maibé ekipa rua iha ona vantajen atu ultrapasa ba ronda 32 no sira tenke esforsu iha jogu ikus.
Husi apitu dahuluk, Brazíl fó kedas presaun no domina jogu. Ekipa Samba konsege hatama golu kontra Haiti iha minutu 12 liuhusi Raphinha. Maibe, golu ne’e árbitru la permite tanba Raphinha iha pozisaun offside.
Notísia relevante : Kopa Mundiál 2026: Vinicius Jr. salva Brazíl husi derrota
Raphinha ameasa fali iha minutu 22. Simu bola ida ne’ebé liu no hasoru Guarda-Rede Haiti nian, avansadu Barcelona ne’e tenta atu hakotu oportunidade ho ficha ida. Infelizmente, bola ne’e la’o dook de’it husi parte loos.
Liu tiha minutu ida, Brazíl ikusmai halakon impase. Matheus Cunha nia naran hahú moris nu’udar markadór iha minutu 23 hafoin susesu hatama bola iha baliza oin no halakon Guarda-Rede Haiti nian. Golu ne’e fó vantajen ba Brazíl ho 1-0.
Brazíl kontinua halo presaun hafoin golu dahuluk. Iha minutu 29, Raphinha hetan tan oportunidade osan-mean ida. Maibé, nia suta ho distánsia besik salva husi Guarda-Rede haitianu.
Matheus Cunha halo fali diferensa iha minutu 36. Avansadu brazileiru ne’e marka nia golu daruak iha jogu ne’e hafoin lansa suta ida ne’ebé maka’as ho ain-karuk husi distánsia besik ne’ebé mak tama iha kantu loos leten husi baliza haitiana. Brazíl aumenta sira nia rezultadu ba 2-0.
Iha minutu 40, Raphinha sofre iha nia ain. Treinadór Brazíl Carlo Ancelotti hasai nia no hatama fali jogadór suplente Rayan.
Iha minutu 45+3, Brazíl aumenta sira nia vantajen liuhusi remate ida Vinicius Junior nian hafoin halo ligasaun ho kruzamentu ida husi nia kolega Lucas Paqueta husi sentru defeza nian.
To’o árbitru huu apitu iha intervalu, laiha tan golu sira ne’ebé maka marka. Brazíl termina parte dahuluk ho vantajen 3-0 hasoru Haiti.
Dolar ba parte daruak, Haiti koko atu brani liu tan no ataka. Iha minutu 63, Haiti ameasa baliza Brazíl nian ho kabesa husi Ricardo Ade. Maski nune’e, ninia kabesa ne’e salva husi Guarda-Rede brazileiru Alisson.
Haree ba intensiade jogu aumenta, jogadór brazileiru Douglas Santos iha minutu 75 halo amesa ba rede Haiti maibé suta ne’ebé nia halo la kona iha alvu.
Jogu la’o to’o minutu 78, Brazíl mós iha vantajen liuhusi suta avansadu Endrick nian. Maibé, golu ne’e árbitru la permite tanba Endrick iha ona offside.
Iha minutu 90+3, Haiti kontinua koko hodi hamenus defisit. Suta ho distánsia dook husi jogadór Dominique Simon maibé la tama tanba salva husi Guarda-Rede Alisson.
Nune’e to’o jogu remata minutu 90 adisionál tan minutu 5 laiha tan golu, nune’e vitória absolutamente prega ba Brazíl.
Jogadór sira husi Brazíl: (4-4-2)
Alisson Becker; Douglas Santos, Gabriel Magalhaes, Marquinhos, Danilo; Casemiro, Bruno Guimaraes (Ederson 81′); Vinicius Junior (Danilo 80′), Lucas Paqueta (Gabriel Martinelli 64′), Raphinha (Rayan 40′); Matheus Cunha (Endrick 64′).
Jogadór sira husi Haiti: (5-4-1)
Johny Placide; Martin Experience, Hannes Delcroix, Jean-Kevin Duverne, Ricardo Ade, Carlens Arcus (Dominique 45′); Ruben Providence, Jean-Ricner Bellegarde (Derrick Etienne 81′), Danley Jean Jacques, Josue Casimir (Louicius Don Deedson 62′); Frantzdy Pierrot (Wilson Isidor 45′).
Jornalista : Hortêncio Sanchez
Editora : Julia Chatarina
