MANATUTU, 06 Jullu 2026 (TATOLI)—Ekipa husi Ministériu Solidaridade Sosiál no inkluzaun (MSSI) no Autoridade Protesaun Sivil, oferese ona asisténsia umanitária ba afetadu konfrontu iha Manatutu.
Iha Domingu (05/07), komunidade iha Bairru Seurtulan no iha Adeia Lei, Suku Orlalan ho komunidade Suku Fatumakerek, Postu Administrativu Laklubar, Munisípiu Manatutu, halo konfrontu hodi rezulta uma lima hetan sunu inklui uma ualu hetan estragu grave.
Ministra Solidaridade Sosiál no Inkluzaun, Verónica das Dores, lamenta ho komunidade husi suku rua ne’e nia hahalok ne’ebé komete konfrontu to’o sunu uma.
“Milísia sira halo ne’e tanba mosu pro no kontra, agora Timoroan ho Timoroan to’o sunu mutuk uma no ema-nia sasán, ne’e ladún di’ak. Tanba ne’e, ohin ami mai lori foos no ai-han balun tan hodi apoiu sira ne’ebé nia uma hetan estragu no sunu,” Ministra Verónica hato’o hafoin hasoru malu ho komunidade iha área Seurtulan, Postu Administrativu Laklubar, Segunda ne’e.
Notísia relevante : Abitante haktuir kronolojia konfrontu entre Suku Orlalan no Fatumakerek
Nia relembra, Primeiru-Ministru, Kay Rala Xanana Gusmão iha Dezembru 2025 konsege halo diálogu ho komunidade husi suku rua ne’e maibé sira la simu malu.
“To’o Maun-Boot mai iha Fatululik momentu ne’ebá bolu joven na’in-tolu maibé la marka prezensa, Maun-Boot rasik hateke no bolu sira hambrik sai tiha de’it,” Governante ne’e haktuir.
Nune’e, nia husu atu problema ne’e presiza nahe biti boot hodi ko’alia ba malu atu nune’e bele simu malu fali.
“Amu Suku, ha’u husu deskulpa barak, ha’u laiha intensaun ida mas ha’u haree hanesan triste oituan mas ita tenta Maromak sei fó solusaun,” nia katak.
Iha parte seluk, Prezidente Autoridade Protesaun Sivíl, Jesuíno dos Reis Matos Carvalho, komprometidu sei koordena ho Prezidente Autoridade Munisípiu Manatutu atu evakua komunidade afetadu hamutuk uma-kain neen ba fatin seguru.
“Ita halo koodenasaun ho Prezidente Autoridade Munisípiu Manatutu para halo evaluasaun ba ita-nia komunide afetadu ba fatin ne’ebé seguru,” nia katak.
Xefe Suku Fatululik, Cesar de Sousa, apresia tanba entidade husi Governu bele hakat mai hodi fó apoiu morál ba komunidade afetadu.
Nia promete sei hamutuk ho Autoridade Munisípiu Manatutu no Komandu Polísia nasionál Timor-Leste (PNTL) Manatutu atu solusiona problema.
“Tanba fatin ne’e iha estrada ibun, labele perturba movimentu ema no transporte iha tempu loron no kalan, situasaun tenke konduzivu fali,” nia tenik
Tuir Jornalista Ajénsia TATOLI nia observasaun, daudaun abitante sira ne’ebé afetadu ba konfrontu evakua ona ba Igreja Cristã Ágape iha Kribas, Postu Administrativu Manatutu Vila.
Jornalista : Natalino Costa
Editora : Julia Chatarina
