DILI, 20 Juñu 2026 (TATOLI)–Ministériu Juventude, Desportu Arte no Kultura (MJDAK) no Federasaun Box Amadora Timor-Leste (FBATL), iha ona konkordánsia atu organiza kampionatu nasionál iha semana oin hodi prepara boxista timoroan ba kompete iha eventu internasionál.
Ministru Juventude, Desportu, Arte no Kultura, Nelyo Isaac Sarmento, hateten, nia parte orienta ona FBATL atu organiza kampionatu nasionál rua iha tinan-ne’e hodi fó oportunidade ba atleta sira bele kompete nune’e bele prepara-an ba eventu internasionál sira.
“Tinan-ne’e ita husu FABTL atu organiza kampionatu rua hanesan juniór no seniór. Enkuantu, ba juniór sei akontese iha loron Segunda (22/06) ne’e, no ba nasionál seniór sei akontese iha Setembru tinan ne’e,” Ministru hato’o ba jornalista sira hafoin halo abertura ba Embaixadór Taekwondo Cup, iha Jináziu Dili, Sábadu ne’e.
Notísia relevante : Boxista Francisco Maulai orgullu bele lori vitória hasoru Vietname
Governu prevee $75.000 ba realizasaun atividade. Governante ne’e prefere FBATL bele organiza kampionatu inklui prepara mós kondisaun atu organiza kongresu nune’e bele hili estrutura foun.
“Ha’u mós ezije ba sira atu prepara rejimentu ba kongresu nian, katak sé mak iha direitu ba votu hodi hili estrutura foun atu lidera federasaun ne’e ba tinan-lima, nune’e hakotu tiha problema ne’ebé mak durante ne’e akontese iha federasaun,” nia akresenta.
Iha sorin seluk, Prezidente Federasaun Box Amadora Timor-Leste, João Jose Fernandes, hateten, sira iha ona planu atu realiza kampionatu nasionál juniór iha 22 Juñu.
“Eventu ne’e ita atu haree boxista sira-nia kapasidade to’o iha ne’ebé, tanba ita sei halo selesaun ba atleta ne’ebé iha ponténsia hodi prepara ba SEA Games nomós eventu ne’ebé sei akontese iha Jakarta,” nia tenik.
Prezidente Federasaun hatutan, eventu ne’e rasik sei partisipa husi klubu 17 no asosiasaun box hamutuk hitu.
“Ita-nia atleta ne’ebé sei partisipa hamutuk na’in-105, sira sei kompete iha kelas terbang, kelas bantam, kelas ringan no wolter ringan,” nia realsa.
João Jose Fernandes esplika, orsamentu ba kampionatu juniór hamutuk $30.000-resin hodi prepara prémiu ba atleta sira. Aleinde ne’e, ba eventu kampionatu señiór ita sei realiza iha 28 Novembru ho nia orsamentu hamutuk $45.000.
Jornalista : Osória Marques
Editora : Julia Chatarina
