DILI, 20 Juñu 2026 (TATOLI)–Paraguai susesu iha nia jogu daruak grupu D Kopa Mundiál FIFA 2026 bainhira halakon nia adversáriu Turkia ho golu úniku 1-0, iha Sábadu meiu-dia oras Timor-Leste nian.
Nasaun rua nia jogu hala’o iha Estádiu San Francisco Bay Area, nune’e Paraguai hetan surpreza ida hodi marka golu lalais iha minutu daruak.
Golu ne’e mosu tanba ain-rua ne’ebé moos, kulmina iha suta ho ain-karuk Matias Galarza nian, ne’ebé halai ba kantu rede nian, halo Guarda-Rede Ugurcan Cakir la kontrolu.
Ho golu dahuluk ne’e, Turkia reazen. Ekipa Vincenzo Montella tenta kontrola jogu hodi buka golu empata.
Oportunidade di’ak ida husi Turkia mosu iha minutu 35. Mert Muldur hasoru suta livre ida ho kabesa iha área penalti nia laran. Infelizmente, bola ne’e kona trave.
Notísia relevante : Estádiu Los Angeles nakdoko, EUA lulun Paraguai 4-1
Liutiha minutu rua, to’o ona Paraguai nia turnu hodi ameasa. Bola ida-ne’ebé liuhusi flanku loos hasoru hosi Juan Caceres, maibé Cakir konsege trava.
Iha minutu 40, jogadór turku sira protesta ba árbitru hafoin Kerem Akturkoglu monu iha área penalti. Maibé, árbitru ignora protestu sira no husu ba jogadór sira atu kontinua.
Jogu ne’e aumenta ba tempu adisionál nian. Árbitru desidi hatudu kartaun mean ba paraguaiu Miguel Amiron, ne’ebé deskonfia uza linguajen ne’ebé la apropriadu.
Desizaun ne’e halo hosi árbitru Ivan Barton hafoin revizaun VAR nian. Ho tempu uitoan de’it, Turkia la konsege kapitaliza sira nia vantajen to’o intervalu.
Paraguai konsege mantein vantajen 1-0 to’o intervalu.
Jogu ne’e krusiál ba ekipa rua hafoin sira rua sofre derrota iha sira nia jogu abertura Grupu D nian. Antes ne’e, Turkia lakon ho Austrália ho 2-0, enkuantu Paraguai lakon ho 4-1 hasoru Estadus Unidus.
Hakat ba parte daruak nian, ekipa rua kontinua mantein ritmu jogu maibé laiha mudansa no laiha tan ekipa ida atu prodús golu.
Kampu laran sai metin husi jogadór ba jogadór, Paraguai tenke hala’o jogu ho kuidadu tanba hela de’it jogadór na’in-10 mak iha kampu laran tanba ida hetan ona kartaun mean.
Maski ho de’it jogadór 10 maibé ekipa Amérika Latina ne’e mantein sira-nia performe hodi hatudu sira-nia forsa katak mai atu kompete la’ós partisipa.
Husi vitória ne’e lori Paraguai ba tur iha pozisaun datoluk iha tabela klasifikasaun provizóriu ho pontu tolu, hanesan ho Austrália maibé Austrália golu liu no tuir iha pozisaun daruak. Enkuantu, Estadu Unidu Amérika tur liu iha pozisaun dahuluk ho pontu neen. Turkia iha liu okos no seidauk rekolla pontu tanba iha jogu dala-rua lakon hotu.
Paraguai ho Austrália sei iha oportuniade bainhira jogu ikus manán sira-nia adversáriu sira sei ultrapasa ba ronda 32.
Turkia (4-2-3-1):
Ugurcan Cakir; Mert Muldur, Merih Demiral, Abdülkerim Bardakci, Ferdi Kadioglu; Ismail Yuksek, Hakan Calhanoglu; Yunus Akgun, Arda Guler, Kenan Yildiz; Kerem Akturkoglu
Paraguai (4-4-2):
Orlando Gill; Juan Caceres, Omar Alderete, Gustavo Gomez, Junior Alonso; Diego Gomez, Andres Cubas, Matias Galarza, Miguel Almiron; Julio Enciso, Isidro Pitta.
Jornalista : Hortêncio Sanchez
Editora : Julia Chatarina
