DILI, 21 Juñu 2026 (TATOLI)—Empreza Aero Dili, Domingu ne’e, lansa voo Dili-Darwin iha Aeroportu Internasionál Prezidente Nicolau Lobato, Komoro, Dili.
Diretór Ezekutivu Empreza Aero Dili, Lourenço de Oliveira, agradese ba parte hotu, nune’e ohin bele lansa atividade voo internasionál ne’e iha Timor-Leste.
“Iha loron ida-ne’e, maski ita lori tempu naruk no hasoru difikuldade barak, maibé ho Na’i Maromak nia tulun, ohin ita bele realiza ita-nia atividade voo Austrália iha Timor. Ha’u laiha buat barak atu ko’alia, maibé ha’u hakarak agradese ba ema hotu-hotu ne’ebé durante tempu ne’e fó suporta no apoiu. Ha’u-nia gratidaun boot ba parte hotu-hotu ne’ebé ajuda Aeroportu Dili hodi haforsa konetividade ba fatin hotu-hotu,” Diretór Empreza hato’o iha Aeroportu Komoro.
Notísia relevante : Marsu-Maiu Aero Dili alarga ligasaun direta entre Dili, Malázia no Austrália
Nune’e mós, Prezidente Repúblika, José Ramos-Horta, agradese ba Diretór Ezekutivu Aero Dili ein nome husi Governu, Estadu no husi povu timoroan.
“Ita iha matenek no kbiit atu ajuda ekonomia Timor-Leste nian liuhusi aviaun ida-ne’ebé lori ita-nia bandeira nasionál. Ida-ne’e importante tebes ba nasaun. Tanba ne’e, husi loron dahuluk kedas ha’u fó apoiu ba inisiativa ida-ne’e. La’ós de’it halo servisu aviasaun, maibé mós halo atividade seluk hodi investe ba ekonomia Timor-Leste. Dala ida tan, parabéns ba ita-nia korajen no ita-nia kbiit. Ha’u hatene Governu tomak iha simpatia, apoiu no admirasaun boot ba ita-nia espíritu empreendedór ne’ebé lori investimentu ida-ne’e ba oin,” Prezidente Repúblika dehan.
Jornalista : Osória Marques
Editora : Julia Chatarina
