DILI, 21 Juñu 2026 (TATOLI)–Ekipa Alemaña susesu iha nia jornada daruak Kopa Mundiál FIFA 2026 iha grupu E bainhira halakon adversáriu Kosta Marfin ho rezultadu mihis 2-1, jogu ne’e hala’o iha Estádiu Tronto Kanadá, iha Domingu madrugada oras Timor-Leste nian.
Bainhira árbitru fó orden liuhusi apitu hodi hamoris jogu, jogadór sira lansa kedan kontra-atake ba malu tuir tékniku no abilidade ekipa rua iha oinsa atu prodús golu.
Alemaña hahú jogu ho konfiansa. Jogadór Die Mannschaft besik atu hetan vantajen iha minutu 10 liuhosi bola pasa husi nia kolega Kai Havertz nia kabesa.
Maski nune’e, oportunidade husi avansadu Arsenal ne’e hetan impedimentu husi Guarda-Rede Kosta Marfim, Yahia Fofana, ne’ebé halo dezempeñu ida-ne’ebé brillante.
Notísia relevante : Kopa Mundiál 2026: Alemaña lulun Coração 7-1
Iha minutu 21, adeptu alemaun sira haksolok bainhira Aleksandar Pavlovic hatama bola ba rede Kosta Marfim nian. Maibé, árbitru la permite golu, hodi deside katak Pavlovic halo foul uluk hasoru guarda-rede Fofana.
Iha minutu 30, Alemaña sofre golu ida bainhira suta husi jogadór Franck Kessie nian, bainhira suta kantu no jogadór ne’e fura rede Alemaña muda rezultadu ba 1-0.
Ho golu ida, Alemaña hakfodak. Kai Havertz selebra nia golu iha minutu 39, maibé ida-ne’e lakon fali. Árbitru deside katak akontese falta ida antes Havertz marka golu. Alemaña kontinua halo presaun ba restu jogu nian, maibé la konsege marka golu iha intervalu.
Tama ba segunda parte, Alemaña hetan presaun maka’as hosi Kosta Marfim iha minutu 10 dahuluk. Felizmente, laiha golu seluk ne’ebé akontese.
Treinadór Alemaña nian, Julian Nagelsmann, hatán ho mudansa boot iha minutu 60. Leroy Sana, Jamal Musiala, no Pavlovic hetan substituisaun, troka hosi Jamie Leweling, Deniz Undav, no Nadiem Amiri.
Mudansa sira fó rezultadu. Amiri halo empata 1-1 iha minutu 68 hafoin halo kontra atake ne’ebé maka’as ba rede Kosta Marfin.
Alemaña besik atu hetan vantajen iha minutu 89. Infelizmente, suta Nathaniel Brown nian salva husi Fofana ne’ebé brillante. Liutiha minutu rua, Fofana enfrenta filafali suta Amiri nian iha área penalidade nian.
Alemaña nia serbisu maka’as ikus mai fó rezultadu iha tempu adisionál nian. Supersub Deniz Undav sai hanesan eroi Alemaña nian hafoin nia suta ho ain-karuk hosi área penalti nia laran halakon Fofana nia brillante.
Hafoin monu iha kotuk, Alemaña taka jogu ho vitória dramátiku. Rezultadu ida-ne’e asegura Alemaña nia fatin iha jogu 32 hosi Kopa Mundiál 2026 nian hafoin vitória 7-1 hasoru Curação iha sira nia jogu abertura.
Jogadór sira husi Alemaña
Manuel Neuer; Joshua Kimmich, Jonathan Tah, Nico Schlotterbeck; Felix Nmecha, Jamal Musiala, Aleksandar Pavlovic, Nathaniel Brown; Leroy Sane, Kai Havertz, Florian Wirtz.
Jogadór sira husi Kosta Marfim
Yahia Fofana; Ghislain Konan, Emmanuel Agbadou, Odilon Kossaounou, Wilfried Singo; Franck Kessie, Ibrahim Sangare, Christ Inao Oulai; Yan Diomande, Ange-Yoan Bonny, Amad Diallo.
Jornalista : Hortêncio Sanchez
Editora : Julia Chatarina
