Kovalima, 22 Juñu 2026 (TATOLI) – Autoridade Munisípiu (AM) Kovalima, liuhusi Komisaun Jestaun Risku Dezastre Munisipál (KJDM) lori fila ona vítima inundasaun husi Sentru evakuasaun Eskola Sekundáriu Jerál Públiku Suai, ba ida-idak nia hela fatin, iha aldeia Akar-Laran, Suku Suai Loro, postu Administrativu Suai, Munisípiu Kovalima.
“ Vítima inundasaun ne’ebé ekipa lori mai iha sentru evakuasaun lori fila ona ba sira-nia hela fatin tanba ha’u rasik observa katak kodisaun di’ak ona nune’e bele lori fila ona vítima dezastre naturál sira”, Prezidente Autoridade Munisípiu (PAM) Kovalima, Miguel Armada Cardoso dehan ba TATOLI iha Salaun AMC.
Autoridade Kovalima liuhusi KJDM lori fila ona vitima dezastre natural ho xefe família hamutuk 118 ho populasaun hamutuk 300-resin ba sira nia helan fatin.
Iha Sorin seluk, Komandante APC Kovalima, Celestino Afonse Ferreira, dehan hafoin evakua vítima sira haree ba kondisaun di’ak ona, ekipa sira lori fila ona vítima sira ba ida-idak nia hela fatin.
“Maske ekipa lori fila ona vítima hirak ba Aldeia Akar Laran, kontinua nafatin fó apoiu emerjénsia ba sira”, nia promete.
Jornalista: Celestina Teles
Editor: Florencio Miranda Ximenes
