DILI, 22 Juñu 2026 (TATOLI)—España susesu iha nia jogu daruak faze grupu Kopa Mundiál 2026 La Roja asegura vitória ida-ne’ebé konvense ho 4-0, hafoin jogadór fitun Barcelona Lamine Yamal marka nia golu dahuluk hodi lori España manán Arabia Saudita iha jogu ne’ebé hala’o iha Estádiu Mercedes-Benz Atlanta, Segunda (22 Jnu 2026) madrugada oras Timor-Leste.
Vitória ne’e hanesan resposta pozitivu ida hafoin España empata sem golu hasoru Kabu-Verde iha sira-nia jogu abertura. Pontu adisionál tolu ne’e hametin liután Luis de la Fuente nia ekipa atu hakat ba eliminatória.
Entretantu, Arabia Saudita la konsege kontinua sira-nia sekuénsia pozitivu hafoin antes ne’e hasoru Uruguai ho empata 1-1. Derrota ne’ebé Saudita enfrenta fó impaktu ba ekipa ne’e atu avansa ba jornada 32.
Bainhira jogu hahú, España kontrola kedas jogu hahú husi minutu dahuluk. Arábia Saudita defende liuliu iha presaun konstante husi sira-nia adversáriu nia atake.
Golu dahuluk mosu iha minutu 10 liuhusi Lamine Yamal. Jogadór ho tinan 18 ne’e remata bola ba baliza Saudita nian basá simu bola pasa husu Mikel Oyarzabal ho distánsia besik hodi muda rezultadu ba 1-0.
Jogu sai manas liutan, España domina liu bola iha kampu laran, Arabia Saudita halo defensivu maibé la bele satan La Roja nia presaun. Ekipa Europeia ne’e hala’o jogu husi pasajen bola husi ain ba ain, halo Arabia Saudita susar atu kombate.
Ho atake ne’ebé lais, La Roja aumenta sira-nia vantajen iha minutu 21 liuhusi finalizasaun Oyarzabal nian. Avansadu Real Sociedad ne’e marka fali golu hodi muda rezultadu ba 2-0.
Arábia Saudita luta atu kompara ho ritmu España nian iha primeira parte tomak. Oyarzabal besik atu marka hat-trick ida antes intervalu hafoin nia oportunidade ida kona de’ir trave. Ho nune’e primeira parte termina ho 3-0.
Tama ba segunda parte, España kontinua halo presaun. Golu dahaat ne’e mosu iha minutu 49 liu husi autogolu Hassan Al-Tombakti hafoin esforsu Marc Cucurella salva husi Mohammed Alowais. Rezultadu muda kedan ba 4-0.
Arábia Saudita iha oportunidade osan-mean iha minutu 81 liuhusi kontra-atake lalais. Abdullah Al Hamdan lansa suta badak ida ho distánsia dook, maibé guarda-rede España Unai Simon alerta no salva bola ho perfeitu.
Tama iha tempu besik jogu atu termina nian, ema barak iha Atlanta hakilar maka’as bainhira Ferran Torres hatama golu ida. España hanoin katak sira hetan ona vantajen 5-0.
Maibé, selebrasaun sira husi jogadór españól sira hetan tesi badak. Árbitru Raphael Claus deside atu haree fali vídeo asistente árbitru (VAR) nian ba indikasaun offside iha preparasaun ba baliza. Hafoin revizaun minutu tolu, árbitru ofisialmente la permite golu iha minutu 90+5 tanba Ferran Torres hamriik iha pozisaun offside molok simu bola.
To’o apitu finál, eskoru mantén 4-0 ba España. Vitória ida-ne’e hametin pozisaun España nian iha grupu H nia leten hosi Tasa Mundiál 2026 nian. España agora daudaun tuur iha primeiru lugar iha Grupu H ho pontu 4.
Molok jogu Uruguai nian hasoru Kabu-Verde, ekipa tolu seluk halibur ona pontu ida-idak. Situasaun ida-ne’e signifika katak korrida ba fatin iha ronde 32 nian sei apertadu.
Klasifikasaun atuál iha Grupu H hafoin jogu España hasoru Arábia Saudita:
España-pontu 4 (jogu 2)
Uruguai-pontu 1 (jogu 1)
Arábia Saudita-pontu 1 (jogu 2)
Kabu Verd-pontu 1 (jogu 1)
España agora presiza de’it pontu ida hasoru Uruguai hodi asegura fatin iha faze eliminatória. Arábia Saudita, iha parte seluk, tenke alkansa rezultadu másimu ida hasoru Kabu-Verde bainhira sira hakarak mantén sira-nia posibilidade hodi hakat husi Grupu H.
España (4-1-2-3):
Unai Simon; Pedro Porro, Pau Cubarsi, Aymeric Laporte, Marc Cucurella, Rodri (kapitaun), Pedri, Lamine Yamal, Dani Olmo, Alex Baena, Mikel Oyarzabal.
Arábia Saudita (5-3-2):
Mohammed Al-Owais (PG); Saud Abdulhamid, Hassan Al-Tambaakti, Ali Lajami, Abdulelah Al-Amri, Moteb Al-Harbi; Nasser Al-Dawsari, Abdullah Al-Khaibari, Musab Al-Juwayr; Feras Al-Buraikan, Salem Al-Dawsari (kapitaun).
Jornalista : Hortêncio Sanchez
Editór : Cancio Ximenes
