DILI, 22 Juñu 2026 (TATOLI)—Primeiru-Ministru Interinu, Mariano Assanami Sabino, deklara katak Governu sei charter (aluga) Aero Dili lori kadaver Saudozu Eis Prezidente Repúblika, Francisco Guterres Lú Olo husi Malázia mai Dili.
“Governu orienta bá ho lideransa Ministru Oan-Soru nian atu organiza Voo espesiál atu lori Antigu Francisco Guterres Lú Olo nia kadaver to’o iha-ne’e (Dili). Ita uza ita-nia aviaun Aero Dili ne’ebé uza mós ita-nia bandeira, más ida-ne’e aluga espesiál de’it tula kadaver saudozu no hamutuk ho família lori mai Timor-Leste,” Vise Primeiru-Ministru Interinu, Mariano Assanami Sabino hateten liuhusi konferénsia imprensa, iha Palásiu Governu, Segunda ne’e.
Notísia relevante: Líder istóriku Lú-Olo hakotu nia peregrinasaun iha Ospitál Malázia
Assanami dehan hafoin kadaver saudozu nian to’o Dili, sei lori diretamente ba saudozu nia rezidénsia iha Faról, Dili, hafoin mak bá fali fatin relevante sira seluk ne’ebé antes ne’e saudozu lidera ka hakna’ar an ba.
Antes ne’e, Primeiru-Ministru Interinu hamutuk ho Ministru Asuntu Kombatente Libertasaun Nasionál, Gil da Costa Monteiro “Oan-Soru “, anúnsia katak sei dekreta loron hitu (hahú aban, 23 Juñu)) ba falesimentu Saudozu Eis Prezidente Repúblika, Francisco Guterres “Lú Olo”.
“Nu’udár Primieru Interinu hamutuk ho Ministru Assuntu Kombatente Libertasaun Nasionál, Gil da Costa Oan Soru, ita hotu sei halo lutu nasional ba loron hitu. Iha tuku 10:30 Otl ami sei realiza reuniaun Konsellu Ministru Estraordinária para dekreta. Ita hotu sente lakon ita-nia kompatriota, ita-nia kamarada, ita-nia komandante,” nia tenik.
Nia sente triste tanba lakon lutadór ida-ne’ebé brani hodi luta libertasaun nasionál ba Timor-Leste.
“Inan-aman povu Timor-Leste tomak, ita rona horikalan notísia ne’ebé triste boot tebes ba ita hotu. Ita lakon ita-nia lutadór ida, ne’ebé hakotu-iis iha Ospitál Prince Court, Kuala Lumpur, Malázia, iha Domingu (21/06), hafoin hala’o tratamentu saúde intensivu kuaze fulan ida,” Assanami dehan.
Reprezentante IX Governu Konstitusionál hato’o kondolénsia kle’an ba família boot partidu FRETILIN no povu Timor-Leste.
“Ita hotu sente lakon. Ita hotu hato’o orasaun importante hodi fó korajen ba família no oan sira, para matein firme, estudu no aprende nafatin hodi hakat bá nia aman nia fatin,” Assanami tenik.
Nune’e mós, Ministru Asuntu Kombatente Libertasaun Nasionál, Gil da Costa Monteiro “Oan-Soru “, reforsa katak hanesan veteranu sente lakon líder ida. Líder ida-ne’ebé luta durante tinan 24 hamutuk ho nia povu. Nunka hakruuk ba polítika invazór sira-nian to’o Timor-Leste nia independénsia.
“Ita haree restaurasaun independénsia tinan 24, korresponde ho luta libertasaun nasionál, luta pátria tinan 24, nia husik ona ita, ne’ebé ita hanesan timoroan, espesiál hanesan veteranu, maibé la ko’alia hanesan veteranu, hanesan Ministru Asuntu Kombatente Libertasaun Nasionál. Saudozu Francisco Guterres “Lú Olo “, sofre moras no ba halo tratamentu iha Malázia durante fulan ida. Nia sai hosi Dili iha 24 Maiu no horikalan rona fali notísia oin seluk,” Oan-Soru haktuir.
Oan-Soru informa daudaun ne’e Saudozu nia kadaver sei iha Malázia, Estadu iha devér morál no ministériu relevante iha responsabilidade atu aban akompaña saudozu nia kadaver filamai Timor.
“Ohin ha’u mai iha-ne’e, ha’u liu iha Saudozu nia Rezidénsia hodi orienta Sekretáriu Estadu balun halo preparasaun. Nune’e, hamutuk ho Primeiru-Ministru Interinu hodi konvoka Konsellu Ministru hodi dekreta hasa’e bandeira meia haste,” Ministru Gil da Costa hateten.
Tuir informasaun ne’ebé TATOLI asesu husi Palásiu Governu katak sei translada Saudozu Lú Olo nia kadaver mai Dili iha aban (23/06/2026).
Jornalista: Osória Marques
Editór: Xisto Freitas da Piedade
