VIKEKE, 22 Juñu 2026 (TATOLI)—Ekipa Institutu Geosiénsia Timor-Leste, Institutu Públiku (IGTL, I..P), foti ona amostra (sampel) tahu ne’ebé hamosu husi rai nakdoko iha foho Builó, entre Postu Ossú no Postu Uatulari, Munisípiu Vikeke.
Sekretáriu Suku Makadike Uaitame, Abílio Lopes haktuir, ekipa husi IGTL mai direta hodi haree no lori ona amostra bá teste iha laboratóriu.
“Liuhusi teste ne’e mak ita bele hatene loloos kauza husi rai nakadoko,” Abílio Lopes ba TATOLI iha Postu Uatulari, Segunda ne’e.
Nia dehan, amostra ne’e IGTL sei lori bá teste durante fulan ida , hafoin ne’e sei lori fali rezultadu hodi aprezenta ba komunidade.
Kona-ba situasaun atuál iha foho Builó, Abílio informa, maski rai nakdoko beibeik no afeta ba uma ruma nakfera, maibé eskala ladún boot, tan ne’e komunidade deside la evakua ba fatin seluk.
Nia subliña fenomena rai nakadoku halo komunidade pániku, maibé seidauk afeta ba sira-nia vida (hanosu mate ka kanek ruma).
Tuir dadus, populasaun ne’ebé hela iha área Aldeia Matadalan, Suku Makadike Uaitame, kompostu husi Suku Makadike de Cima, Uaibobo no Suku Matahoi ho totál populasuan hamutuk 146 no uma-kain totál hamutuk 104.
Jornalista: Vitorino Lopes da Costa
Editór: Xisto Freitas da Piedade
