DILI, 22 Juñu 2026 (TATOLI)—Selesaun Nasionál Béljika dala ida tan la konsege asegura pontu tolu hafoin joga empata lahó golu hasoru Iraun iha sira-nia jogu daruak hosi Grupu G Kopa Mundiál 2026 iha Estádiu Los Angeles, Estadu Unidu, segunda (22 Juñu 2026) madrugada oras Timor-Leste nian.
Rezultadu ne’e koloka Iraun iha lideransa Grupu G nian ho pontu rua liu fali Béljika, ne’ebé iha mós pontu rua iha diferensa golu nian.
Daudaun ne’e, provizóriu Iraun rekolla pontu rua, Béljika pontu rua, Nova Zelandia pontu ida no Ejiptu pontu ida. Husi jogu entre Niva Zelandia no Ejiptu sei realiza segunda dadeer tuku 10h00, se mak manán nia sei lidera grulu G.
Bainhira jogu la’o, Béljika mak domina bola dezde inísiu. Ekipa Rudi Garcia nian foti kedas inisiativa no domina jogu referidu ho 77% iha minutu 10 dahuluk.
Maske maioria defende, Iraun konsege hakat liu baliza Béljika nian iha minutu 25 liuhusi Mehdi Taremi.
Avansadu Olympiacos konsege halakon Thibaut Courtois hafoin hetan pasajen husi Ehsan Hajsafi. Maibé, golu ne’e VAR la permite tanba Taremi antes ne’e iha pozisaun offside.
Béljika kontinua depende ba kriatividade husi Kevin De Bruyne no Youri Tielemans hodi sobu defeza iranianu, maibé liña kotuk iranianu ne’ebé kompaktu no dezempeñu brillante husi guarda-rede Alireza Beiranvand mantén eskoru 0-0 iha intervalu.
Tama ba segunda parte, Béljika rekupera fali kontrolu ba jogu no kria oportunidade oioin. Rudi Garcia koko atu aumenta forsa atake nian hodi lori Dodi Lukebakio no Hans Vanaken.
Situasaun muda maka’as iha minutu 66 bainhira Béljika redús ba jogadór na’in 10. Basá Nathan Ngoy hetan kartaun mean tanba falta ida hasoru Taremi, ne’ebé maka manán bola tanba sala hosi defeza belga ida no hasoru malu ho Courtois.
Ho vantajen numérika, Iraun hahú presiona ho agresivu liu no ameasa baliza belga dala barak. Maibé, Courtois hatudu nia kualidade hanesan guarda-rede ida ne’ebé di’ak liu iha mundu hodi mantein nia baliza ho seguru.
Ho forsa ne’ebé la diferente to’o jogu termina ekipa rua la prodús golu ba malu no rezultadu termna ho empata 0-0. Sira tenke fahe de’it pontu ida-ida ba malu.
Jogadór husi Béljika
Thibaut Courtois; Maxim De Cuyper, Brandon Mechele, Nathan Ngoy, Thomas Meunier; Youri Tielemans, Nicolas Raskin, Kevin De Bruyne, Alexis Saelemaekers; Romelu Lukaku, Leandro Trossard.
Treinadór: Rudi Garcia.
Jogadór husi Iraun
Alireza Beiranvand; Ali Nemati, Shoja Khalilzadeh, Hossein Kanani, Ehsan Hajisafi, Saleh Hardani; Mohammad Mohebbi, Saeid Ezatolahi, Saman Ghoddos, Ramin Rezaeian; Mehdi Taremi.
Treinadór: Amir Ghalenoei.
Jornalista : Hortêncio Sanchez
Editór : Cancio Ximenes
