Parlamentu autoriza viajen PR bá NTT hodi partisipa Festivál Fulan Fehan

DILI, 22 Juñu 2026 (TATOLI) – Prezidente Repúblika (PR), José Ramos-Horta, sei hala’o nia vizita bá distritu (kabupaten) Belu, iha provínsia Nusa Tenggara Timur, Indonézia, entre loron 25 no 28 Juñu 2026, hodi partisipa Festivál Fulan Fehan ba dahaat.

Viajen Prezidente Repúblika nian ne’e ho objetivu mak hametin kooperasaun kulturál entre povu Belu no Timor-Leste.

Xefe Estadu nia vizita hetan autorizasaun ona husi Parlamentu Nasionál, ho votu a favór 33, abstensaun ualu no kontra ida.

Iha karta ne’ebé dirije ba Parlamentu Nasionál, ne’ebé lee sai husi Sekretária Meza, Maria Teresa da Silva Gusmão, hateten Prezidente Repúblika informa katak vizita ne’e hala’o hodi hatán ba konvite husi Governu Distritu Belu nian hodi partisipa iha Festivál. Eventu ida ne’ebé hakarak promove kultura, identidade lokál no kooperasaun entre komunidade timoroan no indonéziu sira husi rai rua ne’e.

Iha karta ne’e, Ramos-Horta destaka katak konvite ne’e reflete karáter kulturál, komunitáriu no amizade transfronteirisu husi fFstivál, subliña lasu istóriku no kulturál sira ne’ebé eziste entre populasaun sira Timor-Leste no Belu nian.

Xefe Estadu mós hatutan katak eventu ne’e reprezenta oportunidade ida atu promove turizmu sustentavel, valoriza patrimóniu kulturál rejiaun nian no hametin relasaun besik entre komunidade rua ne’e iha parte fronteira nian.

Jornalista: Arminda Fonseca

Editora: Maria Auxiliadora