DILI, 22 Juñu 2026 (TATOLI)-Prezidente Repúblika, José Ramos-Horta, hateten Timor-Leste lakon boot bainhira rona novidade eis-Prezidente Repúblika, Francisco Guterres Lú-Olo, hakotu iis iha Ospitál Prince Court, Kuala Lumpur, Malázia.
Ramos-Horta hato’o mensajen ne’e liuhusi nia pájina ofisiál ne’ebé hato’o sentidu kondolénsia ba maktoban nia kaben, oan sira, no membru família tomak, ba lideransa, kuadru sira, no militante sira FRETILIN nian.
“Ha’u hato’o ha’u-nia sentidu kondolénsia kle’an ho Prezidente Francisco Guterres Lú-Olo nia mate iha ospitál ida iha Malázia. Ha’u simu notísia ne’e ho triste tebes no konsidera Prezidente Repúblika Francisco Guterres Lú-Olo nia mate nu’udar lakon boot ida ba nasaun”, Ramos-Horta hateten.
Hodi haktuir katak durante nia estadia badak iha Malázia, husi loron 13 to’o 16 fulan-Juñu, nia bá ospitál ne’ebé Prezidente Francisco Guterres Lú-Olo hela iha unidade kuidadu intensivu.
“Ha’u rona diagnóstiku kona-ba ninia saúde husi ninia médiku timoroan no ko’alia ho ninia kaben, Cidália Lopes Nobre Mouzinho Guterres. Ha’u hetan informasaun kona-ba gravidade husi Prezidente Francisco Guterres Lú-Olo nia kondisaun klínika”, dehan.
Tanba respeitu ba pasiente no família nia privasidade, bainhira fila mai Dili, “ha’u dehan de’it ba jornalista sira katak ha’u bá ospitál hodi husu kona-ba eis-Prezidente Repúblika, Doutór Francisco Guterres Lú-Olo nia saúde, sein elabora kona-ba nia kondisaun klínika. Ha’u privadamente fahe informasaun kona-ba Prezidente Francisco Guterres Lú-Olo nia kondisaun krítiku ho lideransa másimu partidu nian”, nia hateten
Ba Ramos-Horta, Lú-Olo nu’udar patriota boot ida, líder sentrál ida ba luta libertasaun nian, líder partidu istóriku FRETILIN nian, no kaer kargu aas hotu-hotu Estadu nian.
“Ha’u kontaktu ho Embaixadór Timor-Leste iha Malázia atu koordena asaun nesesária hotu-hotu, iha koordenasaun ho estrutura família no Estadu nian, ba translada mate-isin mai Timor-Leste. Ha’u mós kontaktu ho Aero Dili hodi prepara vou espesiál ba transporte mate-isin no membru família sira”, dehan.
Prezidénsia Repúblika, iha koordenasaun ho órgaun sira seluk Estadu nian, sei fó apoiu tomak no onra Estadu nian tomak ba Prezidente Francisco Guterres Lú-Olo.
Notísia relevante: Líder istóriku Lú-Olo hakotu nia peregrinasaun iha Ospitál Malázia
Jornalista: Arminda Fonseca
Editora: Maria Auxiliadora
